बुटवल । एमाले रुपन्देहीका पूर्व अध्यक्ष शिवराज सुबेदीले महाधिवेशन प्रतिनिधि छनौटमा असहयोग गरेको र आफ्नो कार्यकाल असफल बनाउन भूमिका खेलेको भन्दै पूर्व कृषि राज्यमन्त्री समेत रहेका एमाले नेता ओमप्रकाश यादव (गुल्जारी)ले एमालेका सबै जिम्मेवारी त्याग गरेका छन् । महाधिवेशन प्रतिनिधि छनोटको निर्वाचनमा उम्मेदवार भएका गुल्जारीले पार्टीको सबै पदबाट राजीनामा दिएको घोषणा गरेका हुन् ।
शनिबार मायादेवी गाउँपालिका–६ शिवपुर (मर्चवार)मा पत्रकार सम्मेलनको आयोजना गर्दै यादवले एमाले लुम्बिनी प्रदेश कमिटी सदस्य तथा रुपन्देही क्षेत्र नम्बर ४ को सह–इञ्चार्ज पदबाट राजीनामा दिएको घोषणा गरेका हुन् ।
उनले पार्टीको साधारण सदस्यबाट भने राजीनामा नदिएको बताए । नेता यादवले महाधिवेशन प्रतिनिधि छनोटको निर्वाचनमा भएका गतिविधिबारे असन्तुष्टि जनाउँदै प्रतिनिधि छनोटका क्रममा भएका गतिविधिको छानबिन र समीक्षा गर्न समेत नेतृत्वसमक्ष आग्रह गरेका छन् ।
यादवले आफुलाई जिल्लामा काम गर्न पार्टी अध्यक्ष शिवराज सुवेदीबाट असहयोग भएको पत्रकार सम्मेलनमा बताए । उनले जिल्ला पार्टीका पूर्व अध्यक्षबाट आफुलाई असहयोग भएको दाबी गर्दै ३ महिनाअघि नै पार्टी उपमहासचिव विष्णु पौडेललाई जानकारी गराएपनि सुनुवाई नभएको बताए ।
प्रतिक्रिया