एमाले महाधिवेशन : निर्वाचन तालिका पुनः परिवर्तन गर्ने तयारी

काठमाडौं । नेकपा एमालेको चितवनमा जारी १० औँ राष्ट्रिय महाधिवेशन अन्तर्गत संशोधित निर्वाचन तालिका प्रकाशित गरिएको छ । निर्वाचन आयोगबाट सार्वजनिक भएको तालिका अनुसार मध्यरातमा मतदान सम्पन्न गर्ने कार्यक्रम राखिएको छ ।

बन्दसत्र जारी रहेको होटेल सेभेन स्टारको हलमा आज (सोमबार) राति ९ देखि मध्यराती १ बजेसम्म मतदान हुँदैछ । प्रकाशित कार्यतालिकामा उमेदवारउपर उजुरी दिन १५ मिनेट समय तोकिएको छ । उजुरीउपर छानबिन र निर्णयका लागि भने पाँच मिनेटको समय निर्धारण गरिएको छ ।

उम्मेदवारकाे अन्तिम नामावली प्रकाशनमा प्राविधिक कारणले ढिला हुन गएकाले मतदानको तालिका पुनः परिवर्तन हुन सक्ने आयोगका एक पदाधिकारीले बताए । ९ बजे मतदान सुरु हुन नसके ११ बजेको लागि सार्ने तयारी आयोगले गरिरहेको आयोग स्रोतले जानकारी दिएको छ ।