बुटवल । नेकपा माओवादी केन्द्रको लुम्बिनी प्रदेश समिति अध्यक्षमा सुदर्शन बराललाई ल्याउने सहमति भएको छ ।
सम्मेलन सकिएको चार दिनपछि बिहीबार दिउँसो बराललाई अध्यक्ष बनाउन सर्वसम्मत सहमति जुटेको माओवादी प्रदेश कमिटी सदस्य बुद्धि जिसीले जानकारी दिए ।
अध्यक्षमा सहमति भए पनि अन्य पदहरुको भने टुंगो लगाइएको छैन । पदाधिकारीका आकांक्षी धेरै भएकाले पार्टीको केन्द्रीय सम्मेलनपछि टुंगो लगाउने सहमति भएको जिसीले बताए ।
पूर्वसभामुख कृष्णबहादुर महरा र पूर्वमन्त्री वर्षमान पुनले आफू अनुकूलका व्यक्ति प्रदेशको नेतृत्वमा ल्याउन चाहेकाले प्रदेशको नेतृत्व चयनमा सहमति हुन सकेको थिएन । अन्तिममा नेताहरु प्रदेशका पूर्व सामाजिक विकासमन्त्री रहेका गुल्मीका नेता बराललाई अध्यक्षमा ल्याउन सहमतिमा पुगेका हुन् ।
अध्यक्षमा सहमति भए पनि नाम सार्वजनिक अन्य पदाधिकारीको टुंगो लागेपछि मात्रै हुने जिसीले बताए । नेता बरालले भने अध्यक्षमा आफ्नो नाममा सहमति भएको तर औपचारिक घोषणा भने सबै पदाधिकारी टुंगिएपछि मात्र हुने बताए ।
दाङको भालुवाङमा २५-२६ मंसिरमा सम्पन्न लुम्बिनी प्रदेशको प्रथम सम्मेलनले २१७ जना निर्विरोध निर्वाचित गरेको थियो । त्यही समितिले गुल्मीका नेता बरालको नाम टुंगो लगाएको हो । तर यसको लिखित निर्णय भने अझै भइनसकेको बरालले बताए । नेता बराल माओवादी नेता कृष्णबहादुर महरा र वर्षमान पुनको प्रस्तावमा सर्वसम्मत भएका हुन् । उनी पुननिकट मानिन्छन् । लुम्बिनी प्रदेश अध्यक्षका लागि रोल्पाका दिपेन्द्र पुन र दाङका हेमराज शर्माले पनि दावी गरेका थिए । तर उनीहरु २१७ जनामा नपरेपछि बराल सर्वसम्मत भएका हुन् ।
माओवादी केन्द्रको बहुपदीय प्रदेश कमिटीमा एक जना अध्यक्ष, तीनजना उपाध्यक्ष, एक सचिव, एक सहसचिव र एक कोषाध्यक्ष गरी सातजना पदाधिकारी हुनेछन् ।
प्रतिक्रिया