काठमाडौं । प्रधानमन्त्री शेरबहादुर देउवाको आह्वानमा आज सर्वदलीय बैठक बस्न लागेको छ ।
आज अपराह्न ४ बजे प्रधानमन्त्री निवास बालुवाटारमा सर्वदलीय बैठक बोलाइएको छ । संसद्मा प्रतिनिधित्व गर्ने सबै दललाई बैठकमा आमन्त्रण गरिएको छ ।
सर्वदलीय बैठकमा समसामयिक राजनीतिक विषयमा छलफल हुने जनाइएको छ । विशेष गरेर संसद्मा भइरहेको अवरोध हटाउने विषयमा छलफल केन्द्रित हुने जनाइएको छ ।
सभामुख अग्निप्रसाद सापकोटाको राजीनामा माग गर्दै नेकपा ९एमाले०ले संसद् अवरुद्ध गर्दै आएको छ । जसले गर्दा संसद्को कामकारबाही अघि बढ्न सकेको छैन ।
सर्वदलीय बैठक अघि सत्तारुढ गठबन्धनको बैठक बस्ने जनाइएको छ । दिउसो २ बजे गठबन्धनको बैठक बस्ने सूचना तथा सञ्चारमन्त्री ज्ञानेन्द्रबहादुर कार्कीले जानकारी दिएका छन् ।
सत्तारुढ गठबन्धनमा नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी (जसपा) र राष्ट्रिय जनमोर्चा छन् । पाँचै दलका शीर्ष नेता बैठकमा सहभागी हुनेछन् ।
तर एमाले नेताहरुले भने सर्वदलीय बैठकमा सहभागी नहुने जनाएका छन् । एकीकृत समाजवादीका नेताहरुलाई बोलाएकाले बैठकमा सहभागी नहुने नेकपा एमालेका प्रमुख सचेतक विशाल भट्टराईले जानकारी दिए । एमाले विभाजन भएर एकीकृत समाजवादी बनेको हो ।
प्रतिक्रिया