काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले सेटिङमार्फत एमाले अध्यक्ष केपी ओलीको राजनीति बचाएको दाबी गरेका छन् ।
तत्कालीन प्रधानमन्त्री ओलीले पहिलो पटक प्रतिनिधि सभा विघटन गरेको दिन ५ पुसको अवसरमा सोमबार काठमाडौंमा आयोजित कार्यक्रमलाई सम्बोधन गर्दै प्रचण्डले एउटा सेटिङअन्तर्गत ओलीको राजनीति बचाइएको बताएका हुन् ।
निर्वाचन आयोगले कानुनअनुसार काम गरेको भए ओली पार्टीविहीन हुने उनको दाबी छ ।
आयोगले कानुनअनुसार निर्णय लिएको भए ओली पार्टीविहीन, चुनाव चिन्हविहीन बन्नुहुने थियो,’ प्रचण्डले भने, ‘तर, एउटा सेटिङअन्तर्गत उहाँलाई बचाइयो ।’ प्रचण्डले कसले कोसँग कस्तो सेटिङ गरेको हो भन्नेबारेमा केही खुलाएनन् ।
ओलीको राजनीति जोगाउनका लागि ठूलो डिजाइन भएको दाबी गरेका प्रचण्डले ओली अहिले प्रतिगमनकै बाटोमा रहेको आरोप लगाए ।
केपी ओलि हिजो त अलोकतान्त्रिक, निरंकुश र प्रतिगमनकारी छदै थिए आज पनि सदनमा उनको गतिविधि र उनका अभिव्यक्तिले उनी आज पनि अलोकतान्त्रिक, निरंकुश र प्रतिगमनकारी रहेको पुष्ठि भइरहेको प्रचण्डले दाबी गरे ।
उनले भने, ‘हामी उहाँका सबै चालबावी असफल पार्न, गठबन्धनलाई कुनै हालतमा पनि निरन्तरता दिने र लोकतन्त्र र संविधानको रक्षा गर्दै आगामी निर्वाचन फेस गर्छौ ।
प्रतिक्रिया