सम्मेलन सुरुभएकाे १२ दिन पछि प्रदेश नम्बर १ माओवादी केन्द्रको पदाधिकारीका लागि मतदान सुरु

विराटनगर । विवादका कारण लामो समयदेखि पदाधिकारी चयन हुन नसके पछि नेकपा माओवादी केन्द्रको प्रदेश १ को पदाधिकारी चयनका लागि निर्वाचन प्रक्रिया अगाडि बढाइएको छ । निर्वाचन समितिले बुधबार साँझ ७ बजेदेखि मतदान हुन गरी निर्वाचन प्रक्रिया अगाडि बढाएको हो ।

माओवादीको प्रदेश १ कमिटीका लागि अध्यक्षमा तीन जनाको उम्मेदवारी परेको छ भने तीन उपाध्यक्षका लागि १२ जनाले मनोनयन दर्ता गराएका छन्।

अध्यक्षमा मुकसाहाङ मेन्याङ्बो, हर्कबहादुर नेम्वाङ र कुबेर श्रेष्ठले उम्मेदवारी दिएका हुन्। मेन्याङ्बो नेता वर्षमान पुननिकट मानिन्छन् भने नेम्वाङ जनार्दन शर्मा टिमका रुपमा चिनिन्छन् ।

त्यसैगरि, एक सचिवमा तीनजनाले उम्मेदवारी दर्ता गरेका छन्। तीन सहसचिवमा १४ जना र एक कोषाध्यक्षका लागि तीन जनाले उम्मेदवारी दिएका छन्।

निर्वाचनमा पदाधिकारी चयनका लागि प्रदेश समितिका २५९ जनाले मतदान गर्नेछन् । माओवादी केन्द्रको प्रदेश समितिमा ९ जना पदाधिकारी रहने व्यवस्था छ ।

सहमतिको प्रयासका नाममा १२ दिनसम्म चुनाव नगरी बसेको माओवादीले चुनाव र मतगणना तथा शपथग्रहणसमेत बुधबार (आजै) गर्ने गरि तयारी गरेको छ ।

निर्वाचन समितिले शपथ ग्रहण राति ११ः३० बजेका लागि तोकेको छ । गत २५ मंसिरदेखि प्रदेश सम्मेलन सुरु भएको थियो ।