विराटनगर । नेकपा (माओवादी केन्द्र) प्रदेश १ कमिटीको अध्यक्षमा हर्कबहादुर नेम्वाङ विजयी भएका छन् । अध्यक्षमा नेम्वाङले प्रतिस्पर्धी मुक्साहाङ मेन्याङ्बोले प्राप्त गरेको ६४ मतका विरुद्ध १६९ मत ल्याएर विजयी भएका हुन् । पराजित भएका मुक्साहाङ माओवादी नेता वर्षमान पुन निकट हुन् भने विजयी भएका नेम्वाङ अर्थमन्त्री जनार्दन शर्माका स्वकिय सचिव हुन् ।
तीन जना उपाध्यक्षमा देवान चाम्लिङ १२०, शिवकुमार डाँगी ११३ र मणिकुमार साम्पाङ १११ मत ल्याएर विजयी भएका छन् । सचिवमा गणेश उप्रेती १४८ मत ल्याएर विजयी बनेका छन् ।
त्यसैगरि तीन सहसचिवमा कुमारी राई ११४, सागर किराँती ७३ र ऋषिराम ढुंगाना ९५ मतल्याएर विजयी भएका छन् । कोषाध्यक्षमा ९३ मतका साथ रेवतराज पुरी विजयी भए । ९ जना पदाधिकारीका लागि भएको निर्वाचन प्रक्रियामा २४० जनाले मतदान गरेका थिए । ७ मत बदर भएको थियो ।
३ जना सहसचिव पदका लागि भने १३ जनाको उम्मेदवारी परेकोमा ऋषिराम ढुंगाना, कुमारी राई र सागर राई विजयी बनेका छन् ।
सम्मेलनको उदघाटन भएको १२ दिन पछि मात्र प्रदेश सम्मेलनले पदाधिकारी निर्वाचित गरेको हो । विवादका कारण नेतृत्वको सर्वसम्मत चयन गर्ने प्रयास असफल भएपछि बुधवार राती मतदानबाट पदाधिकारी चुनिएका हुन् ।
प्रतिक्रिया