रुसद्वारा पूर्वी युक्रेनमा सैनिक अपरेशनको घोषणा, आत्मसमर्पण गर्न युक्रेनी सेनालाई पुटिनको चेतावनी

काठमाडौं । रुसका राष्ट्रपति भ्लादिमिर पुटिनले पूर्वी युक्रेनको डोनवास क्षेत्रमा सैनिक अपरेशनको घोषणा गरेका छन् ।

रुसको राष्ट्रिय टेलिभिजनमार्फत सम्बोधन गर्दै राष्ट्रपति पुटिनले युक्रेनी सेनालाई आत्मसमर्पण गर्न र घर फर्किन आदेश दिएका छन् । रुसले युक्रेनसँग अझै पनि युद्ध नचाहेको दाबी गर्दै पुटिनले कुनै पनि रक्तपातको लागि युक्रेन स्वयं जिम्मेवार हुने चेतावनी दिएका छन् । उनले रुसी सशस्त्र सेनाले आफ्नो कर्तव्य पुरा गर्ने विश्वास व्यक्त गरेका छन् ।

राष्ट्रिय टेलिभिजनमा बिहानै सम्बोधन गरेका पुटिनले भने,  ‘हाम्रो योजना युक्रेन कब्जा गर्ने होइन, हामी आफूलाई कसैमाथि थोप्ने योजना छैनौं।’

यसअघि बुधबार पूर्वी युक्रेनको डोनेट्स्क र लुहान्स्कको पृथकतावादी नियन्त्रित क्षेत्रका नेताहरुले त्यस क्षेत्रमा सैनिक पठाउन रुसलाई आग्रह गरेका थिए ।

पुटिनले सोमबार मात्र डोनेट्स्क र लुहान्स्कलाई स्वतन्त्र राष्ट्रको मान्यता दिएका थिए ।

रुसी कारवाहीको पश्चिमसहित धेरै देशले निन्दा गरेका छन् । एक हप्ताको बीचमा संयुक्त राष्ट्रसंघ सुरक्षा परिषद्को दुई पटक बैठक बसेको छ ।