नेपालगन्ज । बाँकेको खजुरामा स्थापना गरिने भनिएको लुम्बिनी प्रदेश विश्वविद्यालय अन्यत्र सार्ने षडयन्त्र भएको भन्दै बाँकेमा सर्व पक्षिय संघर्ष समिति गठन गरिएको छ । जिल्ला समन्वय समिति बाँकेको अगुवाईमा आज गरिएको सर्वदलिय र सर्वपक्षिय भेलाले बाँकेका प्रदेशसभा सदस्य एवं पूर्व कृषिमन्त्री आरती पौडेलको संयोजकत्वमा संघर्ष समिति गठन गरिएको हो ।
प्रदेश योजना आयोगका उपाध्यक्ष बामदेव क्षेत्रीले खजुरालाई अनुपयुक्त भन्दै विश्वविद्यालय अन्यत्र सार्ने तयारी भएको बताएसँगै बाँके र बर्दियामा आन्दोलनको तयारी गरिएको हो । संघर्ष समितिमा बाँकेका सम्पूर्ण संघीय र प्रदेशमा सांसदहरु, ८ वटै स्थानीयपालिकाका प्रमुखहरु, बाँकेमा क्रियाशिल संघ, संस्था तथा अधिकारकर्मीका प्रतिनिधिहरुलाई समेटिएको खजुरा गाँउपालिकाका अध्यक्ष किस्मत कुमार कक्षपतिले जानकारी दिए । बाँके र बर्दियाका प्रदेशसभा सदस्यहरुको नेतृत्वमा छिट्टै अस्थायी मुकाम बुटवल पुगेर मुख्यमन्त्री कुलप्रसाद केसीलाई ज्ञापन पत्र बुझाउने भेलाले निर्णय गरेको कक्षपतिले जानकारी दिए ।
उता नेकपा माओवादी केन्द्रका बाँके अध्यक्ष आईपी खरेलले विश्वविद्यालयको मुख्यालय खजुराको रनियापुरबाट कुनैहालतमा लैजान नदिइने बताएका छन् । उनले कसैको लहडमा र आवेगमा प्रदेशसभाबाट पास भएको विश्वविद्यालय सम्बन्धि निर्णय परिवर्तन हुन नसक्ने बताउँदै खरेलले अनाधिकृतरुपमा प्रदेश योजना आयोगका उपाध्यक्षले हल्ला मच्चाएको आरोप लगाए । खरेलले स्थानीय गाँउपालिकाले एक्लै श्रेय लिने नियतका साथ जग्गा प्राप्ती र विश्वविद्यालय स्थपनाको प्रगति लुकाएका कारण विश्वविद्यालय प्रकरणको सृजना भएको समेत आरोप लगाए ।
उपाध्यक्ष क्षेत्रीले पत्रकार सम्मेलनमा खजुरा विश्वविद्यालयका लागि अनुपयुक्त भएको भन्दै दाङको बङ्गलाचुली, दाङकै बेलझुण्डी वा कपिलवस्तुको बहादुरगन्जमा विश्वविद्यालय स्थापना गर्न जग्गाको व्यवस्था हुँदै गरेको बताएका थिए ।
प्रतिक्रिया