रावलपिन्डी । नेपाली सेनाले पाँचौं अन्तर्राष्ट्रिय पाकिस्तान आर्मी टिम स्पिरिट (PATS) प्रतियोगिता २०२२ मा स्वर्ण पदक जितेको छ । सम्पन्न भएको छ ।
पाकिस्तानको पब्बीस्थित नेशनल काउन्टर टेररिज्म सेन्टर (NCTC) आयोजित प्रतियोगितामा नेपाली सेनाले स्वर्ण पदक हासिल गरेको पाकिस्तानी सेनाको इन्टर सर्भिस पब्लिक रिलेसन्स (आईएसपीआर)ले जारी गरेको विज्ञप्तिमा जनाइएको छ ।
प्रतियोगितामा पाकिस्तानी सेनाका आठ र नेपाल, जोर्डन, मोरक्को, टर्की, उज्वेकिस्तान, केन्या, साउदी अरेबिया र श्रीलंका गरी आठ अन्तर्राष्ट्रिय टोलीको सहभागिता रहेको थियो ।
नेपालबाहेक टर्की र उज्वेकिस्तानले पनि स्वर्ण पदक हात पारेका छन् भने केन्या, मोरक्को र श्रीलंका आर्मीले रजत तथा जोर्डन र साउदी अरेबियाको टोलीले काँस्य पदक जितेका छन् ।
प्रतियोगितामा आन्तरिकतर्फ पाकिस्तानको मुल्तान कोर्पसले उपाधी जित्न सफल भयो रावलपिण्डी कोर्पसले दोस्रो स्थान हात पारेको थियो ।
प्रतियोगिताका सहभागीहरुलाई समापन समारोहका प्रमुख अतिथि इन्स्पेक्टर जनरल ट्रेनिङ एण्ड इभ्यालुएसन लेफ्टिनेन्ट जनरल सैयद मुहम्मद अदनानले पुरस्कार तथा मेडल वितरण गरेका छन् ।
समापन समारोहमा साउदीका राजदूत नवाफ सइद अल मलिकी, मोरक्कोका राजदूत मोहम्मद कार्मोने, सहभागी देशका पर्यवेक्षक र रक्षा सहचारीहरूको पनि उपस्थिति रहेको विज्ञप्तिमा जनाइएको छ ।
मार्च ७ देखि ९ तारिखमा ६० घण्टा लामो प्रतियोगिता निकै कठिन रहेको थियो । सहभागी टोलीहरूको शारीरिक सहनशीलता, मानसिक चुस्तता र रणनीतिक दक्षताका आधारमा मूल्याङ्कन गरिएको थियो ।
प्रतिक्रिया