नेपालगन्ज । सुशील कोइराला प्रखर क्यान्सर अस्पतालको निर्माण थाल्ने प्रखर परोपकार मिशन नेपालका संस्थापक, आजीवन तथा साधारण सदस्यका लागि सहुलियत दरमा उपचार गर्ने भएको छ । अस्पताल विकास समितिमा नयाँ नेतृत्व आएसँगै अस्पताल स्थापना गर्ने संस्थाका संस्थापक तथा सदस्यहरुलाई सहुलियत दरमा उपचार गर्ने निर्णय गरिएको हो ।
अस्पताल रहेको खजुरा गाँउपालिकाका स्थायी नागरिकलाई निशुल्क ओपीडी सेवा दिने घोषणा गरेको विकास समितिले अस्पतालको संस्थापक सदस्यहरुलाई ७५ प्रतिशत र साधारण र आजिवन सदस्यहरुलाई ५० प्रतिशत उपचारमा छुट दिने निर्णय गरेको हो ।
अस्पताल विकास समितिले संस्थापक र सदस्यहरुलाई छुट दिने निर्णय गरेपनि अस्पताललाई संघीय सरकारको स्वामित्वमा हस्तान्तरण गरेदेखि प्रखर परोपकार मिशन नेपालको नियमित साधारणसभा समेत हुन सकेको छैन । वार्षिक साधारणसभा र लेखा परिक्षण नहुँदा संस्थाको बैधानिकता माथि नै प्रश्न उठेका बेला विकास समितिले अस्पताल निर्माण गर्ने समितिको अस्तित्वलाई स्विकार गरेको छ ।
संस्थापकहरुको योगदानको सम्मान स्वरुप छुट दिने निर्णय गरिएको विकास समितिका अध्यक्ष किशोर थापाले बताए ।
बैठकले अस्पताल हातामा हाईमास्ट लाइट निर्माण गर्ने समेत निर्णय गर्नुका साथै अस्पतालको प्रवक्तामा विकास समितिका सदस्य सुर्यलाल यादवलाई प्रवक्ता तोकेको छ ।
प्रतिक्रिया