काठमाडौं । भारत भ्रमणमा रहेका प्रधानमन्त्री शेरबहादुर देउवासहितको नेपाली प्रतिनिधिमण्डलले भारतीय समकक्षी नरेन्द्र मोदीसहितको प्रतिनिधिमण्डसँग दुईपक्षीय वार्ता गरेको छ ।
भारतको नयाँ दिल्लीस्थित हैदरावाद हाउसमा भएको दुई पक्षीय वार्तामा नेपाल र भारतबीचको दुईपक्षीय सम्बन्धलाई थप सुदृढ गर्ने विषयमा छलफल भएको छ ।
त्यसअघि दुई देशका प्रधानमन्त्रीबीचको द्विपक्षीय भेटवार्तामा दुई देशका जनताको पारस्परिक हितका लागि द्विपक्षीय सम्बन्धलाई अझ सुदृढ गर्ने बताइएको छ । दुई प्रधानमन्त्रीबीच अझ सुदृढताका साथ विभिन्न क्षेत्रमा सहकार्यलाई अगाडि बढाउने उपायबारे आआफ्नो धारणा व्यक्त भएको थियो ।
दुई प्रधानमन्त्रीले दुई देशका जनताको पारस्परिक हितका लागि द्विपक्षीय सम्बन्धलाई अझ सुदृढ गर्ने र विभिन्न क्षेत्रमा सहयोगलाई अगाडि बढाउने उपायका बारेमा विचार आदानप्रदान गरेका छन्,’ प्रधानमन्त्री शेरबहादुर देउवाको आधिकारिक ट्वीटर मार्फत जानकारी दिइएको छ ।
भारतीय विदेश मन्त्रालयका प्रवक्ता अरिन्दम बागचीले पनि दुई प्रधानमन्त्री सम्बन्धलाई नयाँ उचाई दिने कुरामा छलफल भएको जनाएका छन् ।
‘नेपाल–भारत सम्बन्धलाई नयाँ उचाइमा पुर्याउन मिलेर काम गर्ने,’ देउवा र मोदीबीच भएको छलफलबारे उनले ट्वीटरमा लेखेका छन्, ‘बहुपक्षीय साझेदारीमा व्यापक एजेण्डाहरु वार्तामा छन् ।’
भारतको तीन दिने औपचारिक भ्रमणको सिलसिलामा प्रधानमन्त्री देउवा शुक्रबार नयाँदिल्ली पुगेका हुन् । उनी आइतबार स्वदेश फर्कनेछन् ।
प्रतिक्रिया