नेपालगन्ज । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले जनताले फेरी पनि काँग्रेस, एमाले र मओवादीलाई भोट दिएर जिताएमा पुरानै ब्यक्ति दोहरिएर प्रधानमन्त्री बन्ने र देश झन् दुर्घटनातर्फ जाने निश्चित रहेको बताएका छन् । नेपालगन्जमा शनिबार पार्टीको चुनावी सभालाई सम्बोधन गर्दै अध्यक्ष लिङ्देनले शेर बहादुर देउवा, केपी ओली र पुष्प कमल दाहाल प्रचण्ड अव कति पटक प्रधानमन्त्री भएपछि देश समृद्ध बन्छ ? भन्दै प्रश्न गरे ।
उनले देशमा समृद्धि र सुशासन कायम गर्न राप्रपाको विकल्प नभएको बताउँदै भ्रष्टाचारको जालोमा फसेको देशलाई सुशासन र समृद्धि तर्फ डोर्याउन काँग्रेस, एमाले, माओवादीबाट असंभव भएको बताए । अध्यक्ष लिङ्देनले ठूला दलका नेताहरु गलत बाटोमा हिँडिरहेको र गल्ती सच्याउन पनि तयार नभएको पनि बताए । अब ती नेताहरुलाई सुधार्न भोट नदिएर सचेत गराउनु बाहेक अन्य विकल्प नरहेको उनको भनाई थियो ।
उनले ठुलादलहरुको बाकस रित्तो पार्न र राप्रपामा भोट हाल्न मतदातासँग आग्रह गरे । अध्यक्ष लिङ्देनले भने –‘हारेपछि कि त सुध्रिन्छन्, या त मैदान छोडेर बाहिरिन्छन् ।’ अध्यक्ष लिङ्देनले गठबन्धनले चुनाव जिते देश लडाई झगडामा फस्ने पनि चेतावनी दिए ।
सभालाई सम्बाधेन गर्दै राप्रपाका महामन्त्री एवं नेपालगन्ज उपमहानगरपालिकाका मेयर डाक्टर धवल शम्शेर राणाले सोँच विचार गरेर मात्र भोट हाल्न आग्रह गर्दै अन्यथा नेपालगन्ज उपमहानगरपालिका घुस खोरी र गुण्डाको अखडा बन्ने चेतावनी दिए ।
राप्रपाबाट नेपालगन्जका मेयर पदका उम्मेद्वार नन्दलाल बैश्यले मञ्चमै आफ्नी आमालाई बोलाएर आमाको कसम खाँदै भ्रष्टाचार नगर्ने कसम खाए । आफू शासन गर्न नभई सेवा गर्नका लागि मेयर बन्न चाहेको पनि उनले बताए । उपमेयरका उम्मेदवार बिन्दु चर्तिमगरले नगरमा सेवा गर्ने अवसर दिन आग्रह गरिन् ।
प्रतिक्रिया