खजुरा । बाँकेको खजुरा गाउँपालिकामा नेकपा माओवादी केन्द्र र नेपाली कांग्रेसको गठबन्धन आवद्ध नेताहरुले आफ्नो जीत सुनिश्चित हुँदै गएको दाबी गरेका छन् । गाँउपालिकामा माओवादी र कांग्रेस र वडा स्तरमा नेकपा एकीकृत समाजवादी सहितको गठबन्धन बनाएर चुनावमा उत्रिएको गठबन्धन आवद्ध नेताहरुले चुनाव नजिकिँदै जाँदा आफ्नो पक्षमा समर्थन बढेको दाबी गरेका हुन् ।
गठबन्धनतर्फबाट गाँउपालिका अध्यक्ष पदका उम्मेदवार डम्बर विक ‘तुफान’ ले निर्वाचन जित्नका लागि नै गठबन्धन बनेको बताए । उनले गाँउपालिकाका ८ वडामध्य १ देखि ४ सम्मका ५ वडामा ५ दलीय गठबन्धन भएको छ भने वडा नम्बर १ र ३ मा कांग्रेस र वडा नम्बर २ र ४ मा माओवादीले अध्यक्ष पदको उम्मेदवारी पाएको जानकारी दिए ।
पालिकाका सबै वडामा गठबन्धनले गरेको चुनावी कसरतले खजुरामा गठबन्धनको प्रभाव बढ्दै गएको तुफानले बताए । खजुरामा गठबन्धनतर्फबाट उपाध्यक्ष पदकी उम्मेदवार मञ्जु मल्लले गाँउपालिका गठबन्धनमय बन्दै गएको दाबी गरिन् ।
गठबन्धनले आईतबार गाउँपालिकाका विभिन्न वडाहरुमा निर्वाचन आयोगको आचारसंहितभित्र रहेर प्रचार प्रसार गरेका छन् । सामान्य रुपमै जनताको घरदैलोमा पुगेका गठबन्धनका उम्मेदवारहरुसँग खजुरावासीले आफ्नो ठाउँका समस्या सुनाएका थिए ।
वडा नम्बर २, सीतापुर पुगेका उम्मेदवार सहितको टोलिले जनतासँगको भेटघाटमा वडामा हुने विकास निर्माणका काममा भ्रष्टाचार नगर्नै प्रतिवद्धता जनाए । आफूले निर्वाचन जिते भ्रष्टाचारलाई शून्य सरह बनाउने अध्यक्ष पदका उम्मेदवार तुफानले बताएका थिए । उनले खजुरामा रहेको सुकुम्वासीका समस्यालाई समाधान गर्नका लागि समेत अग्रसरता लिने बताए।
उपाध्यक्ष पदका उम्मेदवारी मल्लले आफू निर्वाचन भएपश्चात सबैलाई समान रुपम सेवा दिने बताइन् ।
प्रतिक्रिया