काठमाडौं । स्थानीय तहको चुनाव आउन २ दिनमात्र बाँकी रहँदा काठमाडौंबाट घर फर्किनेको घुईचो सुरु भएको छ ।
काठमाडौंमा विभिन्न पेशा व्यवसाय गरेर बसेका नागरिकहरु मतदानका लागि आआफ्नो घर फर्किन थालेपछि नयाँ बसपार्क, माछापोखरी, कलंकी, बल्खु, कोटेश्वर लगायतका क्षेत्रमा भीड बढेको छ । नयाँ बसपार्कबाट बाहिरिने अधिकांश बस र माइक्रो बसको भोलिसम्मको टिकट यसअघि नै बिक्री भैसकेको छ ।
मानिसहरु आआफ्नो सामान बोकेर गाडी चढ्न भीड गरेका छन् । कतिपय त सामान ओसार्ने गाडीमा समेत बसेर घर फर्किँदैछन् ।
भीड बढेका कारण ती क्षेत्रमा ट्राफिक जाम समेत बढेको छ । आजैबाट धेरै जसो शिक्षणसंस्था पनि बन्द भएका कारण घर फर्किनेको संख्या बढेको हो । ट्राफिक प्रहरीका अनुसार केहीदिन यता उपत्यका बाहिरिने मानिसको संख्या बढिरहेको छ ।
काठमाडौंबाट मतदानका लागि घर फर्किनेहरु बढेसँगै काठमाडैंको सडकमा सवारीको चाप कम भएको छ ।
सरकारले चुनावको दिन शुक्रबार देशभर सार्वजनिक बिदा दिएको छ ।
प्रतिक्रिया