दुर्घटनाग्रस्त तारा एयरको ब्ल्याकबक्स भेटियो

खबर कुरा
१७ जेष्ठ २०७९, मंगलवार
                 

वेनी । मुस्ताङको थासाङ गाउँपालिका–२ सानुसरेमा आइतबार भएको दुर्घटनामा परेको जहाजको ब्ल्याकबक्स फेला परेको छ ।
ब्ल्याकबक्स फेला परेसँगै दुर्घटनाको कारण पत्ता लाग्ने विश्वास बढेको छ । कुनै पनि जहाज दुर्घटनामा पर्दा जहाजभित्र रहने अति संवेदनशील ब्ल्याकबक्समा नै टावर र पाइलटबीचको संवाद संरक्षित रहेको हुन्छ ।

यसैगरी जहाज दुर्घटनामा ज्यान गुमाएका अन्तिक एक जनाको शव भेटिएको छ । अब जहाजमा सवार २२ जनाकै शव फेला परिसकेको छ । त्यसमध्ये हिजो १० जनाको शव काठमाडौं ल्याइसककिएको छ ।

तीन जना चालक दलका सदस्य र १९ यात्रु लिएर आइतबार बिहान ९ः५५ मा पोखराबाट जोमसोमका लागि उडेको तारा एयरको नाइन–एनएइटी विमानमा सवार सबैको दुर्घटनामा परेर मृत्यु भएको थियो ।

विमानमा सवार सबै जनाको शव भेटिएको मुस्ताङका प्रमुख जिल्ला अधिकारी नेत्रप्रसाद शर्माले जानकारी दिएका छन् । उनकाअनुसार बाँकी शवलाई समेत घटनास्थलबाट कोवाङमा झारेर काठमाडौं पठाउने तयारी भैरहेको छ । कोबाङमा ल्याइएका १२ जनाको शवलाई समेत नेपाली सेनाको हेलिकप्टरमार्फत काठमाडौं पठाउने तयारी गरिएको हो ।

दुर्घटनास्थलबाट ब्ल्याकबक्ससमेत भेटिएपछि शव र दुर्घटनास्थलमा भेटिएका महत्वपूर्ण सामानसहित उद्धारमा खटिएका सुरक्षाकर्मीसमेत फिर्ता भएको प्रजिअ शर्माले बताए ।

तारा एयरको जहाज हराएको १९ घण्टापछि सोमबार बिहान दुर्घटनाग्रस्त अवस्थामा भेटिएको थियो ।

भौगोलिकरूपमा विकट, कुहिरो लाग्ने, पानी र हिउँ परिरहने भएकाले चार हजार २०० मिटर उचाइको भिरमा छरिएर रहेका शव र यात्रुका सामान सङ्कलन गरेर कोवाङमा ल्याउन ढिलाइ भएको हो । थासाङ गाउँपालिकाको केन्द्र कोवाङबाट घटनास्थल पुग्न चार घण्टा उकालो हिँड्नुपर्छ ।

नेपाली सेना, सशस्त्र प्रहरी, नेपाल प्रहरी, शेर्पा र स्थानीयवासी घटनास्थल पुगेर दुर्घटनामा परेर ज्यान गुमाएकाको शव सङ्कलन र उद्धार गरेका थिए । सोमबार बिहान ७ बजेतिर यार्चागुम्बा टिप्न गएका बागलुङको बडिगाड गाउँपालिका–७ का विशाल घर्तीले घटनास्थल देखेर प्रहरीलाई खबर गरेका थिए। उनले इन्धनको गन्ध आएपछि पछ्याउँदै जाँदा जहाज दुर्घटनाग्रस्त अवस्थामा र शव छरिएको अवस्था देखेपछि प्रहरीलाई घटनास्थलको फोटो र भिडियो पठाइदिएका थिए ।

यसमा तपाइको मत

Your email address will not be published.


*