काठमाडौं । नेपाल नागरिक उड्डयन प्राधिकरण (क्यान)ले मौसम सफा नभएसम्म जहाजहरुलाई उडान अनुमति नदिने भएको छ ।
मौसम खराबीका कारण मुस्ताङमा तारा एयरको जहाज दुर्घटना भएको अनुमान गरिएकै बेला क्यानले जहाज प्रस्थान गर्ने विमानस्थल र पुग्नुपर्ने विमानस्थलसहित ‘इनरुट’को मौसम सफा नभएसम्म उडान अनुमति नदिने निर्णय गरेको हो ।
यो नियम आँखाले हेरेर उडान गर्नुपर्ने (भीएफआर) रुट र जहाजको हकमा लागु हुने क्यानका उपमहानिर्देशक देवचन्द्र लाल कर्णले बताएका छन् । यो नियमलाई कडाईका साथ पालना गर्न गराउन क्यानले विमान कम्पनीहरु र विमानस्थलहरुलाई निर्देशन दिएको छ । यसका लागि जल तथा मौसम विज्ञान विभागले गर्ने मौसमसम्बन्धी पूर्वानुमान तथ्यांकलाई ध्यान दिनुपर्नेछ ।
आइतबार बिहान तारा एयरको ट्वीनअटर जहाज पोखराबाट मुस्ताङको जोमसो जानेक्रममा दुर्घटनामा परेको थियो । सो जहाजमा रहेका २२ जनाको मृत्यु भएको छ ।
जहाज दुर्घटजाबारे छानविन गर्न सरकारले सोमबार पाँच सदस्यीय आयोग बनाएको छ । दुर्घटनाको वास्ताविक कारण पत्ता लगाउन र भविष्यमा त्यस्ता दुर्घटना हुन नदिन आयोगलाई कार्यादेश दिइएको छ ।
प्रतिक्रिया