देशको राजनीतिलाई कता लैजाने भन्ने चाबी माओवादीसँग छ : प्रचण्ड

भन्छन्, – आफ्नो पार्टीले १२२ पालिका जित्दा प्रतिक्रियावादीले जिब्रो टोके
खबर कुरा
९ असार २०७९, बिहीबार
                 

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले देशको राजनीतिक यात्राको चाबी माओवादीको हातमा रहेको दाबी गरेका छन् ।

बिहीबार ललितपुरबाट निर्वाचित जनप्रतिनिधिहरु सम्मान तथा प्रशिक्षण कार्यक्रममा बोल्दै अध्यक्ष प्रचण्डले राजनीतिलाई कता लैजाने भन्ने चाबी जनताले माओवादीलाई दिएको बताए । प्रचण्डले भने, ‘परिणामको दृष्टिकोणले राजनीतिको बागडोरलाई कतापट्टि लैजाने राजनीतिक धारालाई कसरी अगाडि बढाउने भन्ने जिम्मेवारी हामीलाई जनताले दिएका छन् । कहीँ न कहीँ यसको चाबी जनताले माओवादी केन्द्रलाई नै दिएका छन् ।’

प्रचण्डले आफ्नो पार्टी १२२ पालिका जितेकोमा प्रतिक्रियावादीहरुले जिब्रो टोकेको टिप्पणी गरे । उनले भने, ‘हामीले त योभन्दा धेरै अपेक्षा गरेका थियौं। देशको दोस्रो ठूलो र पहिलो कम्युनिष्ट पार्टी बन्छौं भन्ने थियो। अरुका लागि भने बढी भाछ, माओवादीको यति आउला भनेर अरुले सोचेका थिएनन् । धेरै दस्तावेजहरू मैले हेरेको छु । ठूलठूला अन्तर्राष्ट्रिय संस्थाहरूले गरेको मूल्यांकनमा हामीलाई ३० वटा पालिकाभन्दा आउँदैन भन्ने थियो । त्यसरी हेर्दा १२२ भनेको धेरै हो । बुर्जुवा र प्रतिक्रियावादीहरूले अहिले जिब्रो टोकेका छन् ।’

प्रचण्डले माओवादी केन्द्रका लागि मुख्य कुरा निर्वाचन सफलतापूर्वक सम्पन्न हुनु भएको बताए । सिटमा केही तलमाथि भए पनि निर्वाचन सफलतापूर्वक सम्पन्न हुनु नै आफूहरूको ठूलो सफलता भएको उनको भनाइ थियो ।

यसमा तपाइको मत

Your email address will not be published.


*