काठमाडौं । सत्तारुढ गठबन्धनले पेट्रोलियम पदार्थको मूल्य घटाउने सहमति गरेको छ ।
सत्ता गठबन्धनको आज बिहान बसेको बैठकमा बैठकमा पेट्रोलिय पदार्थमा लाग्दै आएको कर कटौती गरेर मूल्यघटाउने विषयमा सहमति भएको हो । यसरी कर घटाउँदा डिजेल र पेट्रोलमा २५ देखि ३० रुपैयाँ कटौती हुनेछ । माओवादी अध्यक्ष पुष्पकमल दाहाल प्रचण्डका स्वकीय सचिव रमेश मल्लका अनुसार सरकारले डिजेल र पेट्रोलको मूल्यमा प्रतिलिटर २५ देखि ३० रुपैयाँसम्म घटाउने तयारी गरेको छ ।
आजै मन्त्रिपरिषद् बैठक बोलाएर कर कम गर्ने र आयल निगमलाई मूल्य घटाउन निर्देशन दिन नेताहरु सहमत भएका हुन् । गठबन्धनको निर्देशनका आधारमा सरकारले शनिबारकै दिनदेखि पेट्रोलियम पदार्थमा लगाएका करहरू कटौती गर्ने सरकारका प्रवक्तासमेत रहेका सञ्चार तथा सूचना प्रविधिमन्त्री ज्ञानेन्द्रबहादुर कार्कीले जानकारी दिएका छन् ।
पेट्रोलियम पदार्थमा अत्याधिक मूल्यवृद्धि हुँदा सबैतिर मूल्यवृद्धि भएको र त्यसबाट जनताको अवस्था संकटपूर्ण बन्दै गएको भन्दै नेताहरुले सरकारले बजारमा हस्तक्षेप गर्नुपर्ने धारणा राखेका थिए । कांग्रेस वरिष्ठ नेता रामचन्द्र पौडेलले मूल्यवृद्धि घटाउन राखेको प्रस्तावलाई सबै नेताहरुले समर्थन गरेका थिए ।
प्रतिक्रिया