उपसभामुखको निर्वाचन असार ३१ गते

काठमाडौं । वर्षौसम्म रिक्त रहेको प्रतिनिधिसभाको उपसभामुख पदको निर्वाचन हुने भएको छ । रिक्त उपसभामुख पदको निर्वाचन यही असार ३१ गते हुने भएको छ ।

प्रतिनिधिसभाको आजको बैठकमा सभामुख अग्निप्रसाद सापकोटाले उक्त दिन निर्वाचन हुने र निर्वाचनको कार्यक्रम आजै प्रकाशन गर्न सङ्घीय संसद्का सचिव गोपालनाथ योगीलाई निर्देशन दिएका छन् ।

पूर्वउपसभामुख शिवमाया तुम्बाहाम्फेले राजीनामा दिएपछि उपसभामुख पद रिक्त रहेको छ । उपसभामुख पद नहुँदा संवैधानिक परिषद्को बैठक समेत प्रभावित बनेपछि सत्तारुढ दलहरुले सो पदमा निर्वाचन गराउने योजना बनाएका हुन् ।

यसअघि सरकारले विगतमा केपी ओली सरकारले ल्याएको संवैधानिक परिषदसम्बन्धी अध्यादेश जस्तै गरेर दुई जनाले मात्र निर्णय गर्नसक्ने गरी परिषदसम्बन्धी कानून परिवर्तन गर्न खोजेको थियो ।