काठमाडौ । नेकपा माओवादी केन्द्रका अध्यक्ष पुष्पकमल दाहाल प्रचण्डले भारतीय प्रधानमन्त्री नरेन्द्र मोदीसँग भेटवार्ता हुने भनिए पनि अन्तिम समयमा हुन नसकेको बताएका छन् ।
तीनदिने भारत भ्रमण सकेर स्वदेश फर्किएका उनले मोदीसँग भेटवार्ता के कारणले हुन सकेन भनेर आफूलाई थाहा नभएको बताए । मोदीसँग भेट नभएकोमा कुनै टेन्सन नभएको पनि उनले बताए ।
त्रिभुवन बिमानस्थलमा पत्रकारहरुसँग प्रतिक्रिया दिँदै उनले आफ्नो तीन दिनको भारत भ्रमण सफल भएको दाबी गरे । भ्रमण आफूले सोचेभन्दा राम्रो भएको भन्दै उनले विमानस्थलमा भारतीय जनता पार्टीका अन्तर्राष्ट्रिय विभागका प्रमुख लिन आएको र उनले भारतमा आफ्नो न्यानो स्वागत भएको बताए ।
प्रचण्डले भारतीय राष्ट्रिय सुरक्षा सल्लाहकार अजित डोभलसँग दुई घण्टा एक्लाएक्लै छलफल गरेको खुलासा गरेका छन् । आफूले डोभलसँग लामो छलफल गरेको बताए ।
डोभलसँग नीति निर्माण तथा दुई देशबीचको सम्बन्धको अवसर र चुनौतीका बारेमा कुराकानी भएको उनले बताए। उनले उक्त भेटमा आफूले नेपाल र भारतका विषयमा धेरै कुरा उठाएको दाबी पनि गरे ।
प्रचण्डले भारतीय विदेश सचिव विनयमोहन क्वात्रासँग पनि लामो भेट भएको बताए ।
प्रतिक्रिया