काठमाडौं । पूर्वअर्थमन्त्री जनार्दन शर्माले बजेट निर्माणको क्रममा अनधिकृत व्यक्ति संलग्न नभएको पुनः अडान दोहोर्याएका छन् ।
संसदीय छानविन विशेष समितिको बैठकमा उपस्थित भएर आफुमाथि लागेका आरोपमा बयान दिँदै पूर्वमन्त्री शर्माले बजेट निर्माणको क्रममा करका दर हेरफेरमा अनधिकृत व्यक्ति संलग्न नभएको स्पष्ट पारेका हुन् । शर्माले आफुमाथि लागेका सबै आरोपलाई अस्वीकार गरेका छन् ।
शर्माले आफुमाथि लागेका आरोपको खण्डन गर्दै अर्थमन्त्रालयमा मध्यरातमा अनधिकृत व्यक्ति प्रवेश नगरेको दाबी गरे ।
स्थापित मूल्य, मान्यता, विधि, पद्धतिका आधारमा बजेट निर्माण गरिएको बताउँदै शर्माले अर्थमन्त्रालयका सम्बन्धित अधिकारीहरुबाहेक अन्य व्यक्ति संलग्न नभएको बताए ।
आर्थिक वर्ष २०७९/८० को बजेट निर्माणको क्रममा करको दर हेरफेर गर्न जेठ १४ गते राति मन्त्रालयमा अनधिकृत व्यक्ति संलग्न गराएको आरोप लागेपछि शर्माले २२ असारमा अर्थमन्त्री पदबाट राजीनामा दिएका थिए । सभामुख अग्निप्रसाद सापकोटाले सोही दिन बजेट प्रकरणबारे छानविन गर्न संसदीय छानविन विशेष समिति गठन गरेका थिए । १० दिनको समय दिइएको छानविन समितिले अहिलेसम्म आरोपलाई पुष्टि हुने यौटा पनि प्रमाण फेला पार्न सकेको छैन ।
प्रतिक्रिया