सीट बाँडफाँड गर्न गठबन्धन कार्यदलको बैठक बस्दै

काठमाडौं । आगामी चुनावका लागि सीट बाँडफाँडबारे छलफल गर्न सत्तारुढ गठबन्धन कार्यदलको बैठक बस्दै छ ।

आज अपराह्न ४ बजे प्रधानमन्त्री निवास बालुवाटारमा बैठक बस्ने कार्यदलका सदस्य सचिव केशव जोशीले जानकारी दिए । यसअघि बसेको बैठकले सीट बाँडफाँडका विषयमा सैद्धान्तिक सहमति गरेको थियो ।

आजको बैठकमा सीट बाँडफाँडबारे थप छलफल हुने भएको छ । यससँगै कार्यदलका सदस्यहरुले आआफ्नो दलको धारणा राख्ने जनाइएको छ ।

आगामी मंसिर ४ गते हुने प्रतिनिधिसभा र प्रदेश सभाको चुनावमा तालमेलका लागि सीट बाँडफाँड गर्न गठबन्धनले कार्यदल गठन गरेको थियो । साउन २० गते गठन भएको कार्यदलले तीन वटा बैठक गरेर छलफल गरिरसकेको छ ।

कार्यदलले कांग्रेस नेता कृष्णप्रसाद सिटौलालाई संयोजक तोकेको छ । यसमा कांग्रेसका तीन र अन्य दलका दुई दुई जना सदस्य छन् ।

कार्यदललाई भदौ पहिलो साताभित्र प्रतिवेदन बुझाउन समय दिइएको छ । कार्यदलले बुझाउने सीट बाँडफाँडको प्रतिवेदनका आधारमा गठबन्धनका शीर्ष नेताले निर्णय गर्नेछन् ।