बाँकेको खजुरामा बिद्यालयको छत खसेर ५ बढी बिद्यार्थी घाइते

खजुरा । बांकेको खजुरा गाउँपालिका ६ सिमलघारी शान्तिनगरमा रहेको जनकल्याण माबी खजुरामा बिद्यालयको छत खसेर बिद्यार्थी घाइते भएका छन् ।

विद्यार्थीहरु परिक्षामा बसिरहेकै अवस्थामा छत खसेर विद्यार्थी घाइते भएको बताइएको छ । स्थानीय धनबहादुर केसीले सामाजिक सञ्जालमा फोटो राखेर छत खसेर बिद्यार्थी घाइते भएको जनाएका छन् । उनले केही बिद्यार्थीलाई चोट लागेको बताएपनि घाइते बिद्यार्थीका विषयमा भने विवरण दिएका छैनन् ।

बिद्यार्थी घाइते भएको सम्बन्धमा खजुरा गाँउपालिका शिक्षा शाखाले भने अनविज्ञता प्रकट गरेको छ । शिक्षा शाखा प्रमुख खगेन्द्र मल्लले आफुलेपनि सामाजिक सञ्जालबाट छत खसेको जानकारी पाएको बताए । उनले छत खस्ने अवस्था बारे बिद्यालयका प्रअ र व्यवस्थापन समितिबाट शाखालाई कुनै जानकारी नआएको बताउँदै नयाँ भवनका लागि बजेट पार्न दवाव दिन छत खसेको हल्ला चलाइएको हुन सक्ने बताए ।

विद्यालयका प्रधानाध्यापक दानबहादुर बीसीले भने शिक्षा शाखालाई जानकारी गराइएको दाबी गरेका छन् । उनले छतबाट ढलानका टुक्राहरु खसेर कम्तीमा ५ जना बिद्यार्थी घाइते भएको बताए । २ जनाको खुट्टामा र ३(४ जनाको शरिरका बिभिन्न भागमा ढलानका टुक्रा खसेको उनले बताए ।