बुटवल । केही वर्ष अगाडि सम्म तीजका दिनमा भरिभराउ हुने बुटवलका अधिकांश स्थानहरु यस वर्ष सुनसान जस्तै देखिए । तीजका दिनमा भरिने बुटवल बहुमुखी क्याम्पसका चौर होस् वा सिद्धेश्वर स्कुलको प्राङ्गण, रात्तै सारी लगाएका महिलाहरुले भरिन्थे, तर यस वर्ष बुटवलको देबीनगर चौतारीमा बाहेक अन्य स्थानमा महिलाहरुको खासै चहलपहल देखिएन ।
त्यसो त तीज आउन १ महिना बाँकी छँदा नै कतिपय महिलाहरु तीजगीतमा नाचेर थाकिसकेका पनि थिए । बिभिन्न संघ संस्थाका नाममा होटल र पार्टी प्यालेसहरुमा शुभकामना भन्दै महिनादिन देखि तीजमा नाच्ने धोका पुरा गरेकाले पनि तीजको दिन बुटवलमा चहल पहल नदेखिएको बुटवल बहुमुखी क्याम्पसमा रमझम हेर्न भनेर पुगेका एक दर्शकले बताए । क्याम्पसको प्राङ्गण ज्योतिनगर पहिरोले पुरेपछि क्लास ब्लकको अगाडि एक थान टेण्ट लगाईएपनि मादल बोकेर नाच्न जम्मा हुने महिलाहरु खासै देखिएनन् ।
पुलचोकको दुर्गा मन्दिर, दीपनगरको सिद्धेश्वर स्कुलका प्राङ्गण खाली खाली जस्तै देखिन्थ्यो भने कालिकापथको शिवालय मन्दिरमा पनि सानो संख्यामा भेला भएका महिलाहरुले भजन गाईरहेका देखिन्थे । देबीनगरको चौतारीमा भने यस वर्ष पनि महिलाहरुको जमघट देखियो । त्यहाँपनि मादलमा भन्दा डिजेमा नाच्नेहरु बाक्लो देखिए, तर केही महिलाहरु घरबाटै मादल लिएर गीत गाएको पनि देखियो ।
अचेलको तिजको रौनकतालाई बुटवल उपमहानगरकी उप प्रमुख साबित्रा अर्यालले रत्यौली संस्कति भित्रिएर तीजको रौनकता घटेको बताउँछिन् । तीजको भाकामा परिवारमा बसेर सुन्नै नसकिने गीतहरु बजारमा आएको उपप्रमुख अर्यालको गुनासो छ । खबरकुरासँग कुरा गर्दै उनले महिनादिन पहिले देखि संघसंस्थाहरुको आयोजनामा नाचेर थाकेका कारण पनि तिजको दिनमा महिलाहरु ननिस्केको हुन सक्ने अनुमान पनि गरिन् । ‘रौनकता घटेकै हो, तिजको नाममा बिकृति भित्रिएका छन्, रत्यौलीका गीत जस्तै तिजका गीत छन्, सुन्नै नसकिने ।’ उनले भनिन् ।
आउने साल मौलिकता सहितको तीजगीत कार्यक्रम उपमहानगर आफैले राख्ने प्रतिबद्धता पनि उनले जनाइन् ।
बजार अर्थतन्त्र र उपभोगवादी चिन्तनको विकासले मौलिकता र परम्परालाई कब्जा जमाएको विश्लेषक ऋषि आजादको ठहर छ । उनले उपभोक्तावादी चिन्तनले फेसन देखाउनुपर्ने, ठुला ठुला होटल र पार्टी प्यालेसहरुले महिना दिन अगाडि देखि बोलाउने नचाउने, प्रतिस्पर्धा गराउने, र प्रदर्शनमा आकर्षण दिने गरेकाले मौलिकता हराउँदै गएको बताए । ‘बजार अर्थतन्त्र र उपभोक्तावादले मौलिकतामाथि कब्जा जमायो ।’ उनले भने, ‘होटलको एसीमा डिजे बजाएर नाच्ने बानी परेका चौर र खुल्ला मैदानमा नाच्न सक्ने कुरै भएन ।’
प्रतिक्रिया