एमाले प्रतिगमनकारी नै हो, उसँग गठबन्धन हैन तालमेल मात्र गरेका हौं : मोहम्मद इस्तियाक राई

नेपालगन्ज । जनता समाजवादी पार्टीका कार्यकारिणी समितिका सदस्य एवं संघीय सरकारका भौतिक पूर्वाधार तथा यातायात मन्त्री मोहम्मद इस्तयाक राईले एमालेलाई हेर्ने पार्टीको दृष्टिकोण पूर्ववत रहेको बताएका छन् ।

खबरकुरासँग संक्षिप्त कुरा गर्दै मन्त्री राईले एमाले सिद्धान्ततः प्रतिगमनकै पक्षधर पार्टी भएकोमा आफु स्पष्ट रहेको बताए । उनले एमालेले अहिलेपनि लोकतन्त्र विरोधी पार्टीहरुलाई बोकेर हिँडेको आरोप लगाउँदै जसपाले एमालेसँग गठबन्धन नगरेर चुनावी तालमेल मात्र गरेको बताए ।

नेपालगन्जमा मित्रवत प्रतिस्पर्धाको सम्भावना नरहेको तर्क गर्दै एमालेको समर्थनमा उठ्दै गरेका राप्रपा उम्मेदवार आफ्नो मित्र नभएर प्रतिद्वन्द्वी नै भएको बताए । ‘मित्रसँग पो मित्रवत, मित्र नभएकोसँग केको मित्रवत ?’ उनले प्रश्न गरे ।

एमालेसँगको तालमेलको सम्झौतामा तालमेल नभएका स्थानमा जो सुकैसँग तालमेल गर्न छुट रहेकाले आफ्नो चुनावी तालमेल एमाले बाहेकका दलसँग पनि हुन सक्ने संकेत गरे । ‘तात्कालिन एजेण्डा मिल्नेहरुसँग मात्र गठबन्धन हुन सक्छ, एजेण्डा नमिल्नेसँग ताल मिलाउने मात्र हो ।’ उनले भने, -‘ताल मिलाउनु र गठबन्धन गर्नु फरक कुरा हो ।’

आफ्नो एकसुत्रीय एजेण्डा बाँकेको समृद्धी र विकास भएको बताउँदै राईले बाँकेलाई मुलुकको मुल प्रवाहमा पु-याउन आफुले जो सुकैसँग तालमेल गर्न छुट रहेको बताए । उनले एमालेले लोकतन्त्रलाई दबाउन उद्दत रहेका पार्टीहरुसँग गठजोड मिलाएको आरोप पनि लगाए ।