काठमाडौं । बाँके क्षेत्र नम्बर २ बाट निर्वाचित नेकपा (एमाले)का प्रतिनिधिसभा सदस्य मोहम्मद इस्तियाक राइले नेपालकै सबैभन्दा बढी गर्मीहुने स्थान बाँकेको नेपालगञ्जमा व्याप्त विद्युत समस्या समाधान गर्न सरकारको ध्यानाकर्षण गराएका छन्।
प्रतिनिधि सभाको बैठकमा विशेष समय लिएर बोल्दै सांसद राइले नेपालकै बढी गर्मी हुने स्थान मध्यको नेपालगन्जमा अनियमित विद्युत कटौती र ‘लो भोल्टेज’का कारण सर्वसाधारणको जनजीवन अत्यन्तै कष्टकर बनेको बताए । अत्यधिक गर्मीको समयमा विद्युत सेवा भरपर्दो नहुँदा नागरिकको दैनिक जीवनयापन र बसाइ कठिन भएको उल्लेख गर्दै उनले यस विषयमा सरकार गम्भीर हुन माग गरे ।
सभामुखमार्फत सरकारको विशेष ध्यानाकर्षण गराउँदै सांसद राइले संसदमा भने, ‘नेपालगञ्जमा अहिले विद्युतको अवस्था निकै दयनीय छ। लो भोल्टेज र छिनछिनमा बत्ती काटिने समस्याले आम नागरिक प्रताडित छन् ।’
उनले विशेष समयमा आफुलाई १ मिनेट मात्र समय दिएकोमा व्यङ्ग गर्दै सभामुखलाई धन्यवाद दिए ।
प्रतिक्रिया