आजको मौसम : कमजोर बन्यो मनसुनी वायु, देशभर मौसम सफा

काठमाडौं । आगामी केही दिन देशभर मौसम सफा रहने जल तथा मौसम विज्ञान विभागले जनाएको छ ।

विभागको मौसम पूर्वानुमान महाशाखाका अनुसार लामो समयपछि नेपालमा मनसुनी वायुको प्रभाव कमजोर बनेको छ । जसले गर्दा हाल कर्णाली प्रदेश लगायत पहाडी भू-भागमा आंशिक बदली रहे पनि देशभरको मौसम सामान्यतया सफा रहेको छ ।

आज दिउँसो सुदूरपश्चिम, कर्णाली र लुम्बिनी प्रदेशका पहाडी भू-भागमा आंशिक बदली रही बाँकी प्रदेशमा मौसम सफा रहनेछ । त्यस्तै, सुदूरपश्चिम र कर्णाली प्रदेशका केही स्थानमा मेघ गर्जन र चट्याङसहित हल्का वर्षाको सम्भावना पनि छ ।

राति भने देशको पहाडी भू-भागमा आंशिक बदली रहनेछ । देशका बाँकी भू-भागमा मौसम सफा रहने विभागले जनाएको छ ।

आइतबार पनि सुदूरपश्चिम र कर्णाली प्रदेशका पहाडी भू-भागमा आंशिक बदली रही बाँकी प्रदेशमा मौसम सामान्यतया सफा रहनेछ ।

त्यस्तै, सोमबार पनि सुदूरपश्चिम र कर्णाली प्रदेशका पहाडी भू-भागमा मात्रै आंशिक बदलीको सम्भावना छ । देशका बाँकी भू-भागमा भने मौसम सफा रहनेछ ।