खजुरा । सत्ता गठबन्धनले लुम्बिनी प्रदेशसभामा नेकपा एकीकृत समाजबादीलाई शुन्य सिट दिएपछि असन्तुष्ट रहेका एकीकृत समाजवादीका पोलिटब्युरो सदस्य दलबहादुर सुनार नेकपा माओवादी केन्द्रमा प्रवेश गरेका छन् ।
माओवादीकी बाँके जिल्ला इन्चार्ज पूर्णाकुमारी सुवेदी र जिल्ला संयोजक डम्बर विक तुफानले सुनारलाई पार्टी प्रवेश गराएका हुन् ।
बाँके क्षेत्र नम्बर ३ बाट उम्मेदवार आकांक्षी सुनारले सत्ता गठबन्धनको सिट बाँडफाँडमा उक्त क्षेत्र कांग्रेसलाई परेपछि प्रदेशमै पनि चुनाव लड्ने जानकारी नेतृत्वलाई गराएका थिए । तर, उक्त क्षेत्र माओवादीको भागमा परेपछि उनले स्वतन्त्र उम्मेदवारी दिएका थिए । उनको उम्मेदवारीले माओवादी केन्द्रका प्रदेश उम्मेदवार आईपी खरेललाई असर परेको थियो ।
माओवादी केन्द्र भित्र आईपी खरेललाई दोहोराएर टिकट दिएको भन्दै असन्तुष्टी छरपस्त भएका बेला सुनार माओवादीमा प्रवेश गरेका हुन् ।
२०७० मा बाँके क्षेत्र नम्बर ३ बाट निर्वाचित भएका सुनार सिंचाई राज्यमन्त्री पनि भएका थिए । क्षेत्र नम्बर ३ को दलित समुदायमा सुनारको प्रभाव राम्रो रहेको बताइन्छ ।
प्रतिक्रिया