पत्रकारिता छाडेर अन्य पेशामा गइसकेकाहरुलाई महासंघको सदस्यताबाट विदाई गरौं : विपुल पोखरेल

बुटवल। नेपाल पत्रकार महासंघ रुपन्देहीको ११ औँ साधारणसभा सम्पन्न भएको छ । रुपन्देहीको बुटवलमा बसेको साधारणसभा अध्यक्ष रामराज पोखरेलको प्रगति प्रतिबेदन र कोषाध्यक्ष संजय सौगातको आर्थिक प्रतिबेदन पारित गर्दै सम्पन्न भएको हो ।

साधारणसभाको नेपाल पत्रकार महासंघका केन्द्रिय अध्यक्ष विपुल पोखरेलले उदघाटन गरेका थिए । उदघाटन कार्यक्रमलाई समबोधन गर्दै अध्यक्ष पोखरेलले पत्रकारिता शुद्धिकरणको अभियान सुरु गर्नु पर्ने बताए । उनले शुद्धिकरणको माध्यमबाट पत्रकार महासंघलाई श्रमजीवि पत्रकारहरुको संस्थाका रुपमा मात्रै चिनाउनुपर्ने अवस्था आएको बताए । अध्यक्ष पोखरेलले शुद्धिकरणको सुरुवात पत्रकारिता क्षेत्रबाट विस्थापित भइसकेका र पलायन भएका र पत्रकारिता छाडेर अन्य पेशामा गइसकेकाहरुलाई विदाई गरेर गर्नु पर्ने बताए । ‘सदस्य शुद्धिकरणका सन्दर्भमा पनि शाखाले महत्वपूर्ण निर्णय लिन जरुरी छ । त्यसका लागि साधारणससभा रणनीति तय गर्ने महत्वपूर्ण आधार हुन सक्छ । उनले भने ।

साधारणसभाकै अवसरमा रुपन्देहीमा कार्यरत ९ जना पत्रकारलाई पुरस्कृत गरिएको थियो । नेपाल पत्रकार महासंघ रुपन्देहीले विभिन्न संस्थासंगको सहकार्यमा वितरण गर्दै आएको तीन विधाका पत्रकारिता पुरस्कार ११ औं साधारण सभाकै अवसरमा वितरण गरिउको थियो ।

बुटवल उपमहानगरपालिकाद्वारा स्थापित उत्कृष्ट पत्रकारीता पुस्कार २०७५ बाट यानेन्द्र जिसी, २०७६ बाट रामप्रसाद आचार्य, २०७७ बाट रेखा भुसाल पुरस्कृत भएका छन् ।

सिद्धार्थनगर नगरपालिकाद्वारा स्थापित उत्कृष्ट श्रमजिवि पत्रकारीता पुरस्कार नरेश केसी, प्रकाश न्यौपाने र प्रतीक पौडेलले प्राप्त गरे ।

त्यसैगरि बुटवल पब्लिकेशनद्वारा स्थापित उत्कृष्ट शैक्षिक पत्रकारीता पुस्कारबाट कपिल ज्ञवली, पुजा पन्थी र चन्द्रकान्त खनालले प्राप्त गरे । कोरोनाका कारण दुई वर्षको पुरस्कार वितरण रोकिएको थियो ।