काठमाडौं । नेपाली कांग्रेसले चुनावी घोषणापत्र सार्वजनिक गरेको छ ।
पार्टी कार्यालय सानेपामा कांग्रेस सभापति एवं प्रधानमन्त्री शेरबहादुर देउवाले चुनावी घोषणापत्र सार्वजनिक गरेका हुन् । कांग्रेसले अबको सरकारको नेतृत्व पनि आफ्नै पार्टीको हुने दाबी गर्दै संकल्प पत्र नामको घोषणापत्र तयार पारेको हो । घोषणापत्रमा कांग्रेसले असंवैधानिक रुपमा प्रतिनिधिसभा विघटन नगर्ने प्रतिज्ञा पनि गरेको छ ।
घोषणापत्रअनुसार प्रतिनिधिसभा र प्रदेशसभा निर्वाचनका लागि कांग्रेसको आधिकारिक नारा ‘संविधानको रक्षा, स्थायित्व र सम्मुन्नतिको आधार, नेपाली कांग्रेसको नेतृत्वमा अबको सरकार’ रहेको छ ।
महामन्त्री विश्वप्रकाश शर्मा नेतृत्वमा रहेको ४१ सदस्यीय घोषणापत्र लेखन समितिले एक महिना लगाएर घोषणापत्र तयार पारेको हो । यसअघि तिहार अघि घोषणापत्र सार्वजनिक गर्ने भनिए पनि कांग्रेसले आज मात्र सार्वजनिक गरेको हो ।
घोषणापत्र लेखनका लागि विभिन्न उपसिमिति बनाएर विषयगत छलफल गरिएको थियो ।
घोषणापत्रमा कांग्रेसले दलभित्रको विवादलाई आधार बनाएर प्रतिनिधिसभा विघटन नगर्ने प्रतिज्ञा गरेको हो । यसअघि तत्कालिन प्रधानमन्त्री केपी शर्मा ओलीले पार्टीभित्रको झगडालाई आधार बनाएर दुई पटक प्रतिनिधिसभा विघटन गरेका थिए । तर दुवै पटक सर्वोच्च अदालतले सो निर्णय खारेज गरिदिएको थियो । यसैलाई काउन्टर गर्न कांग्रेसले के गर्छौं के गर्दैनौं भन्ने प्रतिज्ञामा कांग्रेसले भनेको छ, ‘दलहरुको आन्तरिक विवाद र फरक दलहरको बीचमा उत्पन्न हुनसक्ने द्वन्द्व वा विवादका कारण प्रतिनिधिसभालाई विघटन गर्ने अलोकतान्त्रिक र असंवैधानिक कदम चाल्ने छैनौं ।’
कांग्रेसले सरकारी सम्पत्तिको दुरुपयोग तथा प्राकृतिक स्रोत साधनको दोहोन नगर्ने प्रतिज्ञा पनि गरेको छ ।
प्रतिक्रिया