नेपालगन्ज । बाँके क्षेत्र नं. २ का उम्मेदवार इरफान अहमद शेषले भारतीय नम्बर प्लेटका गाडीलाई चुनावी प्रचारमा प्रदर्शन गरेर बाँके प्रशासनलाई चुनौती दिएका छन् । चुनावी प्रदर्शनमा भारतिय नम्बर प्लेटका गाडीहरुको लस्कर लगाएर बाँके प्रशासनलाई उम्मेदवार शेषले चुनौती दिएका हुन् ।
जनमत पार्टीबाट टिकट नपाएपछि स्वतन्त्र उम्मेदवारी दिएका शेषले भारतीय गाडीको लस्कर लगाएर नेपालगन्जमा कारहरुकै ¥याली निकालेका हुन् । जेसीभीको अगाडि उभिएर प्रदर्शनमा सहभागी भएका उम्मेदवार शेषले आफ्नो ब्यानर र झण्डा सहित २० बढी भारतीय कारको लस्कर लगाएर नेपालगन्जमा प्रदर्शन गरेका छन् ।
खुल्लेआम भारतीय कारमा स्वतन्त्र उम्मेदवार शेषको प्रचार समाग्री सजाएर प्रदर्शन गरिएपनि स्थानीय प्रशासनले भने कुनै प्रतिक्रिया नजनाई मौन बसेको छ । ट्राफिक प्रहरीले सुरक्षा र यात्रा गन्तब्य निर्देशन दिँदै गरिएको प्रदर्शन बारे बाँके प्रहरीलाई भने आधिकारीक जानकारी नगएको प्रहरीले जनाएको छ ।
भारतिय नम्बर प्लेटका गाडीमा चुनावी प्रदर्शनका विषयमा प्रशासन गम्भीर रहेको बाँके प्रहरी प्रवक्ता डीएसपी रामप्रसाद घर्ती मगरले बताए । उनले आचारसंहिता विपरित प्रयोग भएको हदसम्म प्रशासनले कारवाही गर्ने समेत जनाए ।
प्रतिक्रिया