नेपालगन्ज । आइतबार हुन गइरहेको निर्वाचनका लागि गएरातीदेखि नेपालगन्ज नाका बन्द गरिएको भएपनि नाकामा भारतबाट नेपाल फर्कनेहरुको घुँइचो लागेको छ । मंसीर ४ गतेको चुनावलाई लक्षित गरी स्थानीय प्रशासनले मंसीर १ गते राती १२ बजेदेखि ४ गते राती १२ बजेसम्म नाका बन्द गरेको भएपनि सूचनाको अभावमा नेपाल फर्कनेको घुँइचो लागेको हो ।
नाका बन्द भएपनि विहानै देखि भारतबाट आएका नेपालीहरु नेपाल भारतको नाकामा आइपुगेका छन् । नाका बन्दको सूचना नपाएर आएका नेपालीलाई दुबै देशका सुरक्षा निकायको समन्वयमा भित्रिन दिइएको बाँके प्रहरी प्रमुख प्रहरी उपरीक्षक श्यामकृष्ण अधिकारीले जानकारी दिए । एसपी अधिकारीका अनुसार नेपालबाट विरामी या आपतमा परेकालाई भारततिर जान पनि दिइएको छ ।
नेपालगन्ज नाकाबाट मात्रै दैनिक ठूलो संख्याका मानिस ओहोर दोहोर गर्ने गर्छन् । चुनावले गर्दा नाका बन्द भएपनि थाहा नपाएका मानिस नाकासम्म आइपुगेका छन् । यस्तालाई स्थानीय प्रशासनले नरमनीति अपनाउदै आउन दिएको छ ।
सीमावर्ती जिल्ला अधिकारीको बैठकले मंसीर १ गते रातीदेखि ४ गते राती १२ बजेसम्म नाका बन्द गर्ने र नाकामा कडा निगरानी गर्ने निर्णय गरेको छ ।
प्रतिक्रिया