खजुरा । जनस्तरबाट स्थापना भएर सरकारले स्वामित्व लिएको बाँकेको खजुरा स्थित सुशील कोइराला प्रखर क्यान्सर अस्पतालमा अव क्यान्सरका सम्पूर्ण उपचार हुने भएको छ । क्यान्सरको उपचारमा प्रयोग हुने मुख्य उपकरण लिन्याक मेसिन अस्पतालमा भित्रिएसँगै खजुरामा क्यान्सरको सम्पूर्ण उपचार हुने भएको हो ।
रेडियो थेरापीसँग सम्बन्धित लिन्याक उपकरण आज अस्पतालमा आइपुगेको अस्पताल विकास समितिका अध्यक्ष टेकेन्द्र मल्लले जानकारी दिए । अध्यक्ष मल्लले लिन्याक मेसिन संचालनमा आएपछि क्यान्सरका बिरामीले सेकाईका (रेडियो थेरापी) लागि भरतपुर ,काठमाडौँ वा भारत पुग्नुपर्ने बाध्यताको अन्त्य हुने बताए । उनले लिन्याक मेसिन संचालनमा आए पछि क्यान्सरका बिरामीहरुलाई अप्रेसन पछि गरिने सेकाई तथा अप्रेसन नगर्दै गरिने सेकाईहरुलाई सहज हुने जनाए।
सामान्य क्यान्सरको लक्षण देखिएका विरामीको किमो थेरापी र सामान्य अप्रेशन भइरहेको खजुराको क्यान्सर अस्पतालमा अव ठुला क्यान्सरका शल्यक्रिया र रेडियो तथा किमोका सबै थेरापी संचालन गर्न सकिने अस्पतालले जनाएको छ ।
धर्मगुरु सन्त दीनदयालजी महाराजबाट संकल्पित क्यान्सर अस्पताल बाँकेको खजुरा र त्यस आसपासका स्थानीयहरुको मुट्ठीदानबाट स्थापना भई २०७२ सालबाट नेपाल सरकारबाट संचालन हुँदै आएको छ । अस्पतालमा उपकरण र भौतिक संरचना निर्माण भएपनि दक्ष जनशक्तिको दरबन्दी श्रृजना नगरिँदा काज र करार सेवामा रहेका चिकित्सक र स्वास्थ्यकर्मीहरुले सेवा दिँदै आएका छन् ।
प्रतिक्रिया