सन्दीप लामिछानेलाई धरौटीमा छाड्ने फैसलाको कैफियत प्रतिवेदन झिकाउन सर्वोच्चको आदेश

काठमाडौं । सर्वोच्च अदालतले क्रिकेटर सन्दीप लामिछाने विरुद्धको मुद्दामा कैफियत प्रतिवेदन झिकाउन आदेश दिएको छ ।

नाबालिग बलात्कारको आरोप लागेका लामिछानेलाई थुनामा राख्न माग गर्दै दायर निवेदनमा सर्वोच्चले पाटन उच्च अदालतको फैसलाको कैफियत प्रतिवेदन झिकाउन आदेश दिएको हो । न्यायाधीश हरि फुयाँलको इजलासले यस्तो आदेश दिएको हो ।

लामिछाने विरुद्ध दर्ता भएको मुद्दादेखि धरौटीमा रिहा गर्ने पाटन उच्च अदालतको आदेशसम्मका सबै कागजात अब सर्वोच्चमा बुझाउनुपर्नेछ ।

आदेशमा लामिछानेलाई किन र के आधारमा छाडेको हो भन्ने विवरण सहितको प्रतिवेदन मगाउन भनिएको छ ।

महान्यायाधिवक्ताको कार्यालयले नाबालिग बलात्कारका आरोपित क्रिकेटर लामिछानेलाई थुनामा राख्न माग गर्दै सर्वोच्चमा दिएको निवेदन बिहीबार दर्ता भएको थियो ।