बुटवल । भोलीदेखि बुटवलमा हुने प्रथम मेयर कप तथा पाँचौ राष्ट्रिय खुला लन टेनिस प्रतियोगिताको तयारी पुरा भएको छ । ५ दिन सम्म सञ्चालन हुने प्रथम मेयर कप तथा पाँचौ राष्ट्रिय खुला लन टेनिस प्रतियोगिता २०७९ सम्पूर्ण तयारी पुरा भएको रुपन्देही लन टेनिस संघका अध्यक्ष गोपाल ज्ञवालीले जानकारी दिए ।
प्रतियोगितामा विभिन्न उमेर समुहमा देशभरका १ सय बढि खेलाडीहरु भाग लिने निश्चित भएको बताउँदै अधिकांस खेलाडीहरु बुटवल आइसकेको अध्यक्ष ज्ञवालीले बताए ।
प्रतियोगिताका लागि देविनगरस्थित लनटेनिस कोर्ट मर्मत र रंगरोगन गरी चिटिक्क पारिएको छ । करीब एक महिनादेखि नियमित मर्मतको काम गरेर ४ वटा कार्ड तयार पारिएको उनले बताए । काठमाडौं पछिको सबैभन्दा सुविधा सम्पन्न टेनिस कोर्ट बुटवलमा तयार पारिएको ज्ञवालीले दाबी गरे ।
ज्ञवालीका अनुसार बुटवल उपमहानगरपालिकाको २ लाख रुपैया र खेलाडीहरुबाट २ लाख रुपैयाँ जुटाएर मैदान तयार गरिएको हो । करीब ७ कठ्ठा क्षेत्रफलमा ४ वटा कोर्ट तयार भएको छ । २ वटा कोर्टसहित एक सय क्षमताको दर्शक बस्ने प्याराफिट राखेपको ८० लाख रुपैया र थप खेलाडीहरुबाट सहयोग जुटाएर कुल १ करोड १७ लाख रुपैयाँमा बि.सं २०७५ सालमा निर्माण भएको हो ।
प्रतियोगितामा पुरुष एकल खुला ३५ वर्ष माथि, ४५ वर्ष माथि र ५५ वर्ष माथि तथा ६५ माथि, महिला एकल खुला, पुरुष युगल खुल्ला, महिला युगल खुला, पुरुष भेट्रान्स ३५ माथि युगल, पुरुष भेट्रान्स ४५ माथि, पुरुष भेटान्स ५५ माथि पुरुष ६५ माथि गरि कुल १२ इभेन्टमा प्रतियोगिता संचालन हुने छ ।
प्रतियोगिताको पुरुष र महिला सिंगल तर्फ उपाधि विजेताले नगद ६० हजार रुपैया, कप, मेडल, प्रमाणपत्र तथा उपविजेताले नगद ३० हजार रुपैया, कप, मेडल, प्रमाणपत्र, तथा तृतिय दुई जना खेलाडीलाई जनही २० हजार रुपैया रुपैया, मेडल, प्रमाणपत्रबाट पुरस्कृत गरिने छ । सिंगलतर्फ नै पुरुष ३५ वर्षमाथिको विजेता, उपविजेता तथा तृतिय स्थान हासिल गर्ने खेलाडीहरुलाई क्रमश नगद ३० हजार, १५ हजार र १० हजार रुपैया ४५ वर्षमाथिका विजेता, उपविजेता तथा तृतिय स्थान हासिल गर्ने खेलाडीलाई क्रमश २५ हजार, १५ हजार र १० हजार रुपैया कप, मेडल, प्रमाणपत्रबाट तथा ५५ वर्षमाथि उमेर समुहको विजेता, उपविजेता र तृतियलाई क्रमश २० हजार, १० हजार र ५ हजार रुपैया, कप, मेडल, प्रमाणपत्र प्रदान गरिने छ ।
यसैगरि ६५ वर्षमाथि उमेर समुहको विजेता, उपविजेता तथा तृतिय खेलाडीलाई क्रमश १५ हजार, ७ हजार ५ सय तथा ५ हजार रुपैया, कप, मेडल, प्रमाणपत्रबाट पुरस्कृत गरिने अध्यक्ष ज्ञवालीले बताए । उनका अनुसार डबल तर्फ पुरुष डबल र महिला डबल उपाधि विजेताले नगद २० हजार, उपविजेताले नगद १० हजार रुपैया, कप, मेडल, प्रमाणपत्रबाट पुरस्कृत गरिने छ । यसैगरि भेट्रान्स डबल्सतर्फ ३५र४५र५५र६५ वर्ष उमेर माथिका विजेता, उपविजेतालाई क्रमश नगद १५ हजार र १० हजार रुपैयासहित कप, मेडल, प्रमाणपत्रबाट पुरस्कृत गरिनेछ । १२ विधामा खेलाइने प्रतियोगिताको पुरस्कारमा ५ लाख २२ हजार ५ सय रुपैया तथा कुल १८ लाख ७२ हजार ५ सय रुपैया खर्च हुने अनुमान गरिएको ज्ञवालीले बताए ।
विश्व खेल जगतमा चर्चित खेल भएपनि केही वर्ष पहिले सम्म यो खेल नेपालमा काठमाण्डौ र पोखरामा केन्द्रित रहेको थियो । पछिल्लो एक दशकमा रुपन्देहीमा समेत लन टेनिसको खेल र खेलाडी विकास भैरहेको छ ।
प्रतिक्रिया