काठमाडौं । नेपाल–पाकिस्तान मैत्री टी २० क्रिकेट प्रतियोगिताको आठौं संस्करण आजदेखि सुरु भएको छ ।
नौ दिनसम्म चल्ने प्रतियोगितामा यस वर्ष १२ वटा क्रिकेट टोलीको सहभागिता रहेको छ ।
पाकिस्तानी राजदूतावासद्वारा आयोजना गरिउको सो प्रतियोगिताको पूर्वउपप्रधानमन्त्री सीपी मैनालीले उद्घाटन गरेका छन् । कार्यक्रमलाई सम्बोधन गर्दै श्री मैनालीले हरेक वर्ष कार्यक्रम सफलतापूर्वक आयोजना गरेकोमा दूतावासको पहलको प्रशंसा गरे । उनले दुई देशका युवालाई एकजुट बनाउन क्रिकेट र खेलकुदको सम्भावना रहेको बताए ।
कार्यक्रममा नेपाल क्रिकेट संघ (क्यान)का पूर्वअध्यक्ष बिनाराज पाण्डेले विशेष अतिथिको रुपमा सहभागिता जनाएका थिए । पाण्डेले आफ्नो मन्तव्यमा दुई देशबीचको द्विपक्षीय सम्बन्धलाई मजबुत बनाउने मात्रै नभई युवाहरूका बीचमा खेलकुद गतिविधिलाई अभिवृद्धि गर्ने अवसरका रूपमा पनि यस्ता कार्यक्रम आयोजना गर्नका लागि पाकिस्तानी दूतावासको प्रयासको प्रशंसा गरे ।
पाकिस्तानी दूतावासका चार्ज डे अफेयर्स उमेर अलीले मानिसहरुलाई एकताबद्ध गर्ने र सद्भाव र टिमवर्कको भावना जगाउने मञ्चको रुपमा काम गर्ने बताए । उनले यस्तो कार्यक्रमले नेपाल र पाकिस्तानबीचको मैत्रीपूर्ण सम्बन्धलाई थप प्रगाढ बनाउन सहयोग पुग्ने बताए । अलीले कार्यक्रम आयोजना गर्न सहयोग गर्नेहरुप्रति आभार प्रकट गरे ।
प्रतियोगिता चैत्र ४ गतेसम्म संचलन हुनेछ । प्रतियोगिताका खेलहरु नेपाली स्पोर्ट्स च्यानल “एक्शन स्पोर्ट्स“ मा प्रत्यक्ष प्रसारण गरिने बताइएको छ ।
प्रतिक्रिया