बारा-२ मा जसपाका उम्मेदवारलाई समर्थन गर्ने कांग्रेसको निर्णय

काठमाडौं । नेपाली कांग्रेसले बारा क्षेत्र नं २ मा हुने उपनिर्वाचनमा जनता समाजवादी पार्टीका उम्मेदवारलाई समर्थन गर्ने निर्णय गरेको छ ।

आइतबार बसेको कांग्रेस कार्यसम्पादन समितिको बैठकले बारा २ मा जसपाका उम्मेदवारलाई समर्थन गर्ने निर्णय गरेको हो । जसपाले यस क्षेत्रमा पार्टी अध्यक्ष उपेन्द्र यादवलाई उठाउने तयारी गरेको छ ।

बैठकले वैशाख १० गते बारा, तनहुँ र चितवनका तीन वटै निर्वाचन क्षेत्रमा हुने निर्वाचनमा गठबन्धनको साझा उम्मेदवार बनाउनका लागि बारामा जसपालाई समर्थन गर्ने निर्णय गरेको हो ।

चितवन २ मा कांग्रेसबाट जितनारायण श्रेष्ठ र तनहुँ १ मा गोविन्द भट्टराईलाई उम्मेवार बनाउने कांग्रेसले निर्णय गरिसकेको छ ।

कार्यसम्पादन समिति बैठकले गत निर्वाचनमा स्वतन्त्र उम्मेदवारी दिएका र अनुशासन उल्लंघन गरेका नेताहरुमाथि गरेको कारवाही पनि फुकुवा गर्ने निर्णय गरेको छ ।