नेपालगन्ज । विगत २ महिनादेखि नेपालगन्जको बागेश्वरी मन्दिरमा संचालन गरिएको महाआरतीमा पूर्वराजपरिवारका सदस्य सहभागी भएका छन् । महाआरतीमा पूर्वराजा ज्ञानेन्द्र शाह, पूर्वरानी कोमल, बुहारी हिमानी, छोरी प्रेरणा सहभागी भएका हुन् । ज्ञानेन्द्र पुत्र पारस भने आरतीमा सहभागी भएनन् ।
नेपालगन्जको बागेश्वरी मन्दिरमा हरेक सोमबार महाआरती हुने गरिएकोमा आरतीको १४ औं संस्करणमा पूर्वराजाका परिवार सरिक हुन पुगेका हुन् ।
पूर्वराजाबाट नागरिक बनेका ज्ञानेन्द्रलाई महाआरतीमा बागेश्वरीका मुल महन्त चन्दननाथ योगीले राजाकै सम्मान प्रदान गरेका थिए । सर्वसाधारण भक्तजनहरुलाई दुर्व्यवहार गर्दै आएका मुल महन्तले पूर्वराजासहित परिवारलाई भने अतिविशिष्ट सम्मान दिँदै विशेष आसनमा बसालेका थिए । पूर्वराजाका परिवारलाई हेर्न ठूलो भीड लागेको थियो ।
पूर्वराजपरिवारका सदस्य बागेश्वरी मन्दिरमा केहीबेर पूजा गरेपछि महाआरतीमा सहभागी भएका थिए । पूर्वराजालाई राप्रपाका महामन्त्री एवं प्रतिनिधि सभाका सांसद डा. धवलशमशेर राणा, बागेश्वरी मन्दिरका मूल महन्त चन्दननाथ योगीलगायतले स्वागत गरेका थिए ।
शुक्रबार नेपालगन्ज पुगेका पूर्वराजा शाहलाई २० गते नेपालगन्जमा राप्रपाका महामन्त्री धवलसम्सेरको अगुवाईमा राजाबादीहरुले अभिनन्दन गर्ने तयारी गरेका छन् । एक महिना नेपालगञ्ज बस्ने कार्यतालिका बनाएका पूर्वराजाले लुम्बिनी, कर्णाली र सुदूरपश्चिम प्रदेशका विभिन्न जिल्लाको भ्रमण गर्दैछन् । ज्ञानेन्द्रको आइतबार जुम्ला जाने कार्यक्रम भने मौसमका कारण स्थगित भएको थियो ।
फोटो सौजन्य : भगतराम थारु
प्रतिक्रिया