नेपालगन्ज । कर्णालीको डोल्पा सडकसञ्जालमा जोडिएसँगै हवाई कम्पनीहरुको एकल अधिपत्यको अन्त्य भएको छ । सडक सञ्जालको अभावमा हवाई मार्गबाट मात्र यात्रा गर्न बाध्य हुदै आएका कर्णाली प्रदेशका डोल्पालीहरु अव नेपालगन्जबाट बस चढेर गृह जिल्ला जान सक्ने भएका छन् ।
सडक सञ्चालनमा आए लगत्तै यातायात व्यवसायीले नेपालगन्जदेखि डोल्पासम्मका लागि बस सेवा सञ्चालनमा ल्याएका छन् । आजबाट हरेक दिन दिउसो ३ बजे डोल्पाका लागि दैनिक एक बस छुटाउने गरी तयारी गरिएको यातायात व्यवसायीहरुले जानकारी दिएका छन् ।
देउराली यातायात प्रालिका अध्यक्ष लक्ष्मण केसीका अनुसार डोल्पाको से–फोक्सुण्डो यातायात र नमस्ते देउराली यातायात प्रालि नेपालगन्ज बीचको सहकार्यमा बस सेवा सञ्चालन गर्न लागिएको हो ।
हवाई टिकट नपाएर महिनौसम्म नेपालगन्जमा बेखर्ची भएर बस्नु पर्ने डोल्पाली जनताको बाध्यतालाई समाधान गर्ने गरी दैनिक एक बस दुबै तिरबाट छुट्ने गरी सञ्चालन गरिने अध्यक्ष केसीले बताए ।
ब्यवसायीले डोल्पासम्म एकतर्फी प्रति व्यक्ति ३ हजार ५सय भाडा तय गरेका छन् ।
डोल्पा सडक सञ्जालसंग जोडिएसंगै पहिलो पटक आरामदायी सिट सहितको नयाँ बस सञ्चालन गर्न लागिएको हो ।
प्रतिक्रिया