काठमाडौं । विराट कोहलीको कीर्तिमानी शतकका बाबजुद रोयल च्यालेन्जर्स बैंग्लोर भारतमा जारी १६ औँ संस्करणको इण्डियन प्रिमियर लिग (आइपिएल) बाट बाहिरिएको छ । गएराति सम्पन्न खेलमा गत विजेता गुजरात टाइटन्सविरुद्ध ६ विकेटले पराजित भएसँगै बैंग्लोर आइपिएलबाट बाहिरिएको हो ।
बैंग्लोरले प्लेअफमा स्थान बनाउन गुजरातलाई हराउनैपर्ने समीकरण बनेको थियो । यदि जित हात पारेको भए ऊ मुम्बई इण्डियन्सलाई नेट रन रेटमा पछि पार्दै प्लेअफमा पुग्ने थियो ।
बेंगलुरुस्थित एम चिन्नास्वामी स्टेडियममा टस हारेर ब्याटिङको निम्तो पाएको घरेलु टोलीले निर्धारित २० ओभरमा ५ विकेट गुमाएर १ सय ९७ रन बनायो । उसका लागि विराटले शतकीय पारी खेले । ६१ बलको सामना गरेका उनले १३ चौका र १ छक्कासहित अविजित १ सय १ रन बनाए । आइपिएल २०२३ मा कोहलीको यो लगातार दोस्रो शतक हो ।
उनले अघिल्लो खेलमा सनराइजर्स हैदराबादविरुद्ध ६३ बलमा १२ चौका र ४ छक्कासहित १०० रन बनाएका थिए । आइपिएल इतिहासमा कोहलीको यो सातौँ शतक हो । आइपिएलमा ७ शतक बनाउने उनी एक्लो ब्याटर हुन् ।
यस्तै, लिगको अन्तिम खेलमा कप्तान फाफ डुप्लेसिसले २८, माइकल ब्रेसवेलले २६, अनुज रावतले अविजित २३ र ग्लेन म्याक्सवेलले ११ रन जोडे । गुजरातका लागि नूर अहमदले २, राशिद खान, यश दयाल र मोहम्मद शामीले १/१ विकेट लिए ।
जवाफी ब्याटिङ गरेको गुजरातले १ सय ९८ रनको लक्ष्य १९.१ ओभरमा ४ विकेट गुमाएर पूरा गर्यो । उसका लागि ओपनिङ ब्याटर शुभमन गिलले शतकीय पारी खेले । ५२ बलको सामना गरेका उनले ८ छक्का र ५ चौकासहित अविजित १०४ रन बनाए । जारी सिजनमा गिलको यो लगातार दोस्रो शतक हो ।
अघिल्लो खेलमा उनले हैदराबादविरुद्ध १ सय १ रनको इनिङ खेलेका थिए । यस्तै, बैंग्लोरविरुद्ध विजय शकंरले ५३ र ऋद्धिमान साहले १२ रनको योगदान दिए ।
बैंग्लोरका लागि मोहम्मद सिराजले २, हर्षल पटेल र विजयकुमार वैशाकले १/१ विकेट लिए । योसँगै प्लेअफ पुग्ने चार टोलीको टुंगो लागेको छ । यसपटक गुजरातसँगै चेन्नई, लखनउ र मुम्बईले प्लेअफको यात्रा गरेका हुन् ।
राजस्थान, बैंग्लोर, कोलकाता, पञ्जाब, दिल्ली र हैदराबाद भने लिग चरणबाट बाहिरिए ।
प्रतिक्रिया