काठमाडौं । माछापुच्छ्रे बैंकको रौतहटस्थित चन्द्रपुर शाखाका ग्राहकको खाताबाट रकम हराएको सम्बन्धमा विभिन्न सञ्चारमाध्यमहरूमा आएका समाचार गम्भीर ध्यानाकर्षण भएको जनाएको छ ।
बैंकले खाताबाट रकम हराएकोबारे आफ्नो सिस्टममा कुनै पनि समस्या नदेखिएको जनाएको छ । बैंकले गरेको अनुसन्धानमा सबै रकम ग्राहकको मोबाइल बैंकिङ प्रयोग गरी अन्य बैंकका विभिन्न खाताहरु तथा खल्ती वालेटमा ट्रान्सफर गरेको देखिएको जानकारी पनि बैंकले दिएको छ ।
बैंकको सिस्टममा कुनै समस्या नभएको र बैंकबाट पठाइएका सबै एसएमएस, एक्टिभेसन कोड र ओटिपी ग्राहककै मोबाइलमा गएको देखिएकाले उक्त कोड अनाधिकृत व्यक्तिलाई जानकारी नगराइ वा ग्राहकको मोबाइलमा अनाधिकृत पहुँच नपुर्याइ उक्त कारोबार हुन नसक्ने बैंकले ठहर गरेको छ ।
यस विषयमा प्रहरीबाट थप अनुसन्धान सुरु भैसकेको जानकारी पनि बैंकले दिएको छ । ग्राहकहरुको बैंक खातामा रहेको बचत पूर्णरुपमा सुरक्षित रहेको स्पष्ट पार्दै बैंकले मोबाइल बैंकिङ तथा अन्य डिजिटल सेवाहरुको प्रयोग गर्दा सावधानी अपनाउन पनि सबैलाई अनुरोध गरेको छ ।
प्रतिक्रिया