जलहरी प्रकरण : अख्तियारको टोली पशुपतिमा

काठमाडौं । पशुपतिनाथ मन्दिरमा चढाइएको सुनको जलहरी प्रकरणमा अख्तियारमा उजुरी परेपछि जलहरीको छानविन गर्न अख्तियार दुरूपयोग अनुसन्धान आयोगको टोली पशुपति पुगेको छ।

अख्तियारका अनुसन्धान अधिकृतसहितको टोली जलहरीको छानविन तथा सो प्रकरणको अनुसन्धानका लागि आज पशुपति पुगेको छ । अघोष्तिरुपमा पशुपतिनाथको मुलगेट सिल गरेर अख्तियार टोलीले मन्दिर भित्र छानविन सुरु गरेको छ । अख्तियारको टोली भित्र प्रवेश गरेसँगै सर्वसाधरणलाई प्रवेश नदिइएको पशपति दर्शनका लागि पुगेका एक भक्तले बताए ।

तत्कालिन प्रधानमन्त्री केपी ओलीले १०७ किलो ९२४.७५ ग्राम सुनको जलहरी चढाएको भनिएपनि महालेखा परीक्षकको प्रतिवेदनमा १० किलो ९७६ ग्रामको रिङ बनाएर हालेको भनिएको पुष्टि नहुने उल्लेख भएर आएपछि जलहरी प्रकरणले चर्चा पाएको थियो।

पशुपति विकास कोषका सदस्य–सचिव मिलनकुमार थापाले भने सुनमा कुनै प्रकारको बदमासी नभएको दाबी गर्दै आएका छन्। संसदीय समितिमा बयान दिँदै उनले सुनमा घटी आए आफूलाई जस्तो सुकै सजाँय मन्जुर हुने बताएका थिए।