नेपालगन्ज । सीमावर्ती रुपईडिहामा रहेको भारतीय अध्यागमन कार्यालयले सेवा प्रवाह बन्द गरेसँगै नेपालगन्जमा रहेको अध्यागमन कार्यालय कामबिहिन बनेको छ । पहिलो पटक कोभिड सङ्क्रमण बढेपछि सीमा नाका बन्द भएलगत्तै भारतले अध्यागमन कार्यालय बन्द गरेसँगै नेपालगन्जको अध्यागमन कार्यालय कामबिहिन बनेको हो ।
भारतको अध्यागमन कार्यालय बन्द भएपछि नेपालगन्ज नाका भएर हुने पर्यटकहरूको आवागमन पनि बन्द भएको छ ।
करिब तीन वर्षदेखि अध्यागमन कार्यालय नेपालगन्जका कर्मचारीले नाका प्रयोग गरेर ओहोरदोहोर गर्न खोज्ने पर्यटकलाई सम्झाई बुझाई गराई अन्य नाकाको प्रयोग गर्न सुझाव दिने बाहेकका काम गर्न सकेका छैनन् ।
भारतको अध्यागमन कार्यालय बन्द भएदेखि नै नेपालगन्जको अध्यागमन कार्यालयले सेवा दिन नसकेको कार्यालयका वरिष्ठ अध्यागमन सहायक कृष्णा रानाले बताए ।
विदेशी पर्यटकलाई भारततर्फ काम नहुने भएपछि सुनौली वा अन्य नाकाबाट भारत प्रवेश गर्न सुझाव दिइने गरेको उनले बताए । रानाका अनुसार पछिल्लो समय भने अध्यागमन कार्यालयले भारतीय पक्षसँग समन्वय गरी तेस्रो देशबाट फर्केका भारतीयलाई प्रस्थान तथा दिल्ली हुँदै अन्य देशबाट फर्केका नेपालीलाई आगमन स्वीकृति दिने गरेको छ ।
कार्यालयले दिएको जानकारी अनुसार आर्थिक वर्ष २०७९।८० मा विदेशबाट नेपाल हुँदै भारत प्रवेश गर्न आएका १७ जना भारतीय नागरिकलाई अनुमति दिइएको छ । सोही अवधिमा ३ जना नेपालीलाई नेपालगन्ज प्रवेश अनुमति दिइएको छ । उनीहरू तेस्रो देशबाट भारत हुँदै नेपाल प्रवेश गरेका हुन् ।
प्रतिक्रिया