चितुवाको आक्रमणबाट घाइते निलगाई बचाउने पशु चिकित्सकको प्रयास असफल

नेपालगन्ज । बाँकेमा चितुवाको आक्रमण परी घाइते भएको एक नीलगाईलाई बचाउन पशु चिकित्सकहरु असफल भएका छन् । चितुवाको आक्रमणमा परी घाइते भएको नीलगाईलाई उपचारको सबै उपाय अपनाईएपनि बचाउन नसकिएको राप्ती सब डिभिजन वन कार्यालय मेहमानपुरका फरेष्टर सन्तोष खत्रीले जानकारी दिएका छन् ।

खत्रीका अनुसार राप्ती सोनारी गाउँपालिका वडा ५, ढलैयास्थित राप्ती सब डिभिजन वन कार्यालय अन्तर्गत राप्ती पीडित तथा गुलरी सामुदायिक वन उपभोक्ता समूहको ब्लक नं. ५ मा चितुवाले आक्रमण गरी घाइते भएको अवस्थामा सो नीलगाई भेटिएको थियो । उनका अनुसार मंगलवार दिउँसोबाट उक्त नीलगाईको उद्धार गरी उपचार शुरु गरिएको थियो ।

आक्रमणमा परी घाइते भएको सो नीलगाईको जङ्गलमै पुगेर समूहका पदाधिकारी, एकीकृत भूपरिधि व्यवस्थापन आयोजनाका प्रतिनिधि तथा वन कर्मचारीको टोलीले प्रारम्भीक उपचार शुरु गरेको र तत्पश्चात् उक्त नीलगाईलाई उद्धार गरी राप्ती सब डिभिजन वन कार्यालयमा पुर्याई पशु भेटेरिनरी चिकित्सक सम्म पु¥याईएको थियो । चिकित्सकले थप उपचार गर्ने क्रममा नीलगाई मरेको खत्रीले बताए ।

नीलगाईलाई सब डिभिजन वन कार्यालयको परिसरमा नियमानुसार प्रक्रिया पुर्याई खाडल खनी गाडिएको उनले जानकारी दिए ।