काठमाडौं । सरकारले ल्हारक्याल लामालाई लुम्बिनी विकास कोषको कार्यकारी उपाध्यक्ष पदमा नियुक्त गरेको छ । वैदेशिक रोजगार, अवैध हतियार, दोहोरो नागरिकतासहित विभिन्न अभियोगमा पटकपटक पक्राउ परेका लामा लुम्बिनी विकास कोषको उपाध्यक्षमा नियुक्त भएका हुन ।
सरकारले औपचारिकरुपमा लामाको नियुक्तिबारे नखुलाएपनि बैठकबाट उनलाई उपाध्यक्षमा नियुक्त गर्ने निर्णय भएको स्रोतले दाबी गरेको छ ।
उनी ०६७ मा एमालेबाट अर्थराज्यमन्त्री बनेका थिए । तर, विवादका कारण उनले छोटो समयमै राजीनामा दिनुपरेको थियो । त्यसपछि उनी ०७० सालमा तत्कालीन एकीकृत माओवादीमा प्रवेश गरका थिए ।
माओवादी केन्द्रका केन्द्रीय सदस्यसमेत रहेका ल्हारक्याल लामा यस अघि अर्थ राज्यमन्त्री, गुम्बा ब्यवस्थापन समितिको अध्यक्ष बनिसकेका ब्यक्ति हुन् । उनी दुबै पटक संविधानसभा सदस्यसमेत रहेका थिए । उनी कोषको उपाध्यक्ष बन्न निकै अघिदेखि प्रयासरत थिए ।
ल्यारक्यालको धार्मिक नाम डा. खेन्पो छिमे छिरिङ हो र सिन्धुपाल्चोक हेलम्बुका बासिन्दा हुन् । उनले बाल्यकालको शिक्षा हेलम्बु र त्यसपछि काठमाडौं बौद्धमा आर्जन गरे भने दक्षिण भारतको कर्नाटक राज्यस्थित मसुरीको निङ्मा विश्वविद्यालयबाट १२ वर्ष लामो अध्ययनपछि खेन्पो डिग्री हासिल गरेका हुन् ।
लुम्बिनी कोषका उपाध्यक्ष अवधेशकुमार त्रिपाठीको गत साउन १० गते कार्यकाल सकिएपछि लामालाई नियुक्त गरिएको संघीय सरकारका एक मन्त्रीले जानकारी दिए ।
प्रतिक्रिया