बुटवल । अख्तियार दुरुपयोग अनुसन्धान आयोगले इलाका प्रहरी कार्यालय बुटवलका तत्कालिन प्रहरी नायब उपरीक्षक (डीएसपी) ठगबहादुर केसीविरुद्ध भ्रष्टाचार मुद्दा दायर गरेको छ ।
इलाका प्रहरी कार्यालय बुटवल रुपन्देहीको कार्यालय प्रमुख रहँदा गरेको भ्रष्टाचार अभियोगमा तत्कालिन डीएसपी केसीविरुद्ध बुधवार विशेष अदालत काठमाडौंमा भ्रष्टाचार मुद्दा दायर गरिएको आयोगको प्रवक्ता भोला दाहालले जानकारी दिए ।
केसीमाथि बुटवल उप–महानगरपालिका अन्तर्गत हाटबजार नजिकबाट एकजना सेवाग्राहीको सुन लिई फिर्ता नगरेको र सेवाग्राहीले फिर्ता माग्दा रकम माग गरेको आरोप छ । प्रहरी प्रधान कार्यालयको टोलीले केसीको निवासबाट नगदसहित सुन बरामद भएको थियो ।
अनुसन्धानको क्रममा उनले २०७९ मंसिर २५ गते ३४ तोला २१ लाल ७ प्वाइन्ट सुन अनुसन्धान भन्दै बरामद गरेर १५ दिनसम्म आफू कार्यरत कार्यालयको निवासमा लुकाएर राखेको खुलेको थियो ।
उनले प्रहरीको कुनै निकायमा जानकारी नदिई सेन धनीसँगै मोलमोलाई सुरु गरेको खुलेको आयोगका प्रवक्ता दाहालले बताए ।दाहालका अनुसार १५ दिनसम्म सुन आफैंसँग गोप्य राखी सेवाग्राहीसँग अन्य व्यक्तिमार्फत घुसको मोलमोलाई गरी ८ लाख ५० हजार रुपैयाँ नगद र ९ लाख ५० हजारको चेक लिएको समेत पुष्टि भएको थियो ।
उनीविरुद्ध कैद र बिगो बमोजिम जरिवानाको मागदाबी गर्दै मुद्दा दायर गरिएको आयोगले जनाएको छ । उनी प्रहरी सेवाबाट बर्खास्तमा परिसकेका छन् ।
प्रतिक्रिया