बुटवल । बुटवलमा जारी नेकपा एमालेको प्रथम लुम्बिनी प्रदेश अधिवेशनको निर्वाचन प्रक्रिया स्थगित गरिएको छ । सुरक्षाका कारण रातीको समयमा निर्वाचन नगराउन प्रशासनले भनेको भन्दै मतदान प्रक्रिया स्थगित गरिएको हो ।
आज मध्यान्हबाटै निर्वाचन प्रक्रिया अन्तर्गत मतदान सुरु हुने भनिएपनि निर्वाचन समितिको आन्तरिक तयारी कमजोर देखिएपछि मतदान प्रक्रिया सारिँदै आएको थियो । अन्तमा राती ९ बजेबाट मतदान गर्ने गरि सबै तयारी पुरा गरिएपनि प्रशासनको आदेश भन्दै मतदान स्थगित गरिएको अधिवेशनका एक प्रतिनिधिले बताए । नेताहरुको थकाउने र गलाउने रणनीति अन्तर्गत लगातार निर्वाचन सारिँदै गरेको पनि ति प्रतिनिधिले बताए ।
रातीमा सुरक्षा र अन्य व्यवस्थापनमा असहजता देखिएका कारण बिहान ७ बजेबाट मतदान सुरु गर्ने गरि स्थगित गरिएको निर्वाचन समितिले जनाएको छ ।
स्रोतका अनुसार हरि रिजाल समुहले सुरक्षाको कारण देखाउँदै प्रशासनमा स्थगित गराउन माग गरे अनुसार मतदान स्थगित गरिएको नाम नबताउने सर्तमा राधाकृष्ण कंडेल निकटका एक प्रतिनिधिले बताए ।
कँडेल पक्षले एमाले उपाध्यक्ष विष्णु पौडेलको समर्थन रहेको र रिजाल पक्षले महासचिव शंकर पोखरेलको समर्थन रहेको प्रचार गरिरहेका छन् ।
सचिवबाहेक अध्यक्ष, उपाध्यक्ष र दुई उपसचिव तथा सदस्यहरुमा निर्वाचन हुने भएको छ । भदौ १६ र १७ गतेका लागि तय भएको प्रदेश अधिवेशन १९ गते मात्रै मतदान हुने समय तय भएको छ ।
निर्वाचन आयोगका प्रमुख हरिप्रसाद भण्डारीले मंगलबार बिहान ७ बजेदेखि निर्वाचनको तयारी गरिएको जानकारी दिए ।
अधिवेशनमा पार्टी अध्यक्ष केपी ओलीको निर्देशन विपरित अध्यक्ष पदमा वर्तमान अध्यक्ष राधाकृष्ण कंडेल र केन्द्रीय सदस्य हरि रिजालले प्रदेश अध्यक्ष पदमा उम्मेदवारी दिएर चुनाव हुने वातावरण बनाएका छन् । अध्यक्ष ओलीले उदघाटन सत्र र बन्द सत्रमा सर्वसम्मत नै नेतृत्व चयन गर्न निर्देशन दिएका थिए । निर्देशन विपरित दुबै अध्यक्षका उम्मेदवारहरुले प्यानल नै खडा गरेर चुनावमा भिडन्त सुरु गरेका छन् ।
प्रतिक्रिया