मस्को । उत्तर कोरियाली नेता किम जोङ उन र रुसी राष्ट्रपति भ्लादिमिर पुटिनबीच साइबेरियाको अमुर क्षेत्रको रुसी अन्तरिक्ष केन्द्रमा भेटवार्ता भएको छ । यो केन्द्र भ्लादिभोस्तकबाट करिब एक हजार किलोमिटर टाढा छ ।
दुई शीर्ष नेताबीच भएको भेटवार्तामा सैनिक क्षेत्र लगायत महत्वपूर्ण विषयमा छलफल भएको क्रेमलिनका प्रवक्ता दिमित्रि पेस्कोभले बताएका छन् । दुई सार्भभौममुलुक बीच भएको छलफलमा तेस्रो मुलुकले चासो राख्न आवश्यक नभएको टिप्पणी उनले गरेका छन् । यो भेटवार्तालाई अमेरिका लगायत पश्चिमा देशहरुले उत्तर कोरियाद्वारा युक्रेन विरुद्ध रुसलाई हतियार आपूर्ति हुनसक्ने आशंका गरेका छन् ।
भेटवार्ताअघि नेता किम कालो लिमोजिनमा कस्मोड्रोमको रकेट प्रक्षेपण गर्ने भवनमा आइपुग्दा राष्ट्रपति पुटिनले स्वागत गरेका थिए । दुवै नेताले मुस्कुराउँदै हात मिलाए र केही शब्दहरू आदान प्रदान गर्नुभयो । क्रेमलिनको आधिकारिक टेलिग्राम च्यानलमा पोस्ट गरिएको भिडियोमा दुई नेताले हात मिलाउँदै गरेको देखिन्छ ।
नेता किमले राष्ट्रपति पुटिनलाई उनको व्यस्त कार्यतालिकाका बाबजुद पनि भ्रमणका निम्ति निमन्त्रणा गरेकोमा धन्यवाद व्यक्त गरेका थिए । यसबाट उत्तर कोरिया र रुसबीचको रणनीतिक सम्बन्ध र दुवै देशका समान प्राथमिकता प्रतिबिम्बित भएका उनले उल्लेख गरे ।
यसअघि रुसी राष्ट्रपति पुटिन र उत्तर कोरियाका सर्वोच्च नेता किमबीच सन् २०१९ मा भेटवार्ता भएको थियो ।
प्रतिक्रिया