नेपालगन्ज । बाँकेको जयेन्दु बाल सुधार गृहमा आजपनि दिनभरी झडप र तोडफोड चलिरहेको छ । बालबन्दीलाई सम्झाउन भन्दै बालगृहमा प्रवेश गरेका प्रहरी सहायक निरीक्षकको पेस्तोल बालबन्दीहरुले कब्जा गरेको स्रोतले दाबी गरेको छ ।
बिहीवार राती १० बजेदेखि नै आपसमा भएको झडपपछि तोडफोड र आगजनीमा उत्रिएका बालबन्दीले प्रहरीको मोटरसाइकल, कागजपत्र जलाउनुका साथै आज पेस्तोल नै कब्जामा लिएको स्रोतको दाबी छ ।
लगातार तोडफोडमा उत्रिएका बालबन्दीलाई सम्झाएर वार्तामा ल्याउने प्रयास भइरहेको प्रहरीले जनाएको छ ।
तोडफोड गरिएको भवनका बालबन्दी आज अपरान्ह प्रहरीसँग वार्ताका लागि बाहिर आएका छन् । दुईवटा भवनमा रहेका बालबन्दीहरु मध्य एउटा भवनमा रहेकाहरुमात्र तोडफोडमा उत्रिएका थिए । अर्को भवनका बालबन्दी शान्त रहेका छन् ।
नेपाल प्रहरी र सशस्त्र प्रहरी टोलीले बाल सुधार गृह परिसरभित्र पसेर माइकबाट सम्झाएपछि दुई जना नाइके तल झरेको बताइएको छ ।
दुई पक्षको झडप, तोडफोड, आगजनी, भागाभागले गर्दा रातभरी नै ठूलो संख्यामा प्रहरी परिचालन गरिएको थियो । सुधार गृहबाट बाहिरिएका ४ जना बाहेक सबै प्रहरी नियन्त्रणमा आइसकेका छन् ।
आज मध्यान्ह सम्मपनि स्थिती काबुमा नआएपछि लुम्बिनी प्रदेशका डिआइजी उमेशराज जोशी र लुम्बिनी ट्राफिकका एसपी कृष्णप्रसाद प्रसाई नेपालग आएका छन् ।
झडपमा ११ जना घाइते भएकोमा एक जनाको मृत्यु भएको छ । १० जनाको उपचार भइरहेको छ ।
प्रतिक्रिया